Напаѓачот е уапсен и се наоѓа во притвор, а шпанските власти, според агенциите, го истражуваат инцидентот како можен терористички акт
Едно лице е убиено, а друго тешко рането кога маж вооружен со мачета вчера нападнал две цркви во шпанскиот град Алхесирас, соопшти министерството за внатрешни работи на земјата.
Како што соопштил портпаролот на градската администрација на Алхесирас за Ројтерс, во нападот е убиен Диего Валенсија, црковно лице во црквата Нуестра Сењора де ла Палма, додека титуларниот свештеник на парохиската црква Сан Исидро, Антонио Родригез, е меѓу повредените.
Шпанските судски власти, според Асошиејтед прес (АП), го истражуваат инцидентот како можен терористички акт, а полицијата се обидува да ги утврди мотивите за нападот.
Според информациите, напаѓачот е уапсен и се наоѓа во притвор во шпанската национална полиција. Од министерството за внатрешни работи на Шпанија не го соопштиле идентитетот на осомничениот.
Инаку, локалните медиуми јавуваат дека во нападот се повредени уште три лица.
Осомничениот маж прво влегол во црквата Сан Исидро и со мачета го нападнал свештеникот, кој, според локалните медиуми, е тешко повреден и хоспитализиран .
Напаѓачот потоа отишол во црквата во Нуестра Сењора де ла Палма каде со мачетата го убил црковното лице пред верскиот објект.
Шпанскиот премиер Педро Санчез на својот твитер-профил изрази сочувство за жртвите од „страшниот напад“ во Алхесирас.
Quiero trasladar mis más sinceras condolencias a los familiares del sacristán fallecido en el terrible ataque de Algeciras. Deseo una pronta recuperación a los heridos.
— Pedro Sánchez (@sanchezcastejon) January 25, 2023
Todo nuestro apoyo al trabajo que están llevando a cabo las Fuerzas y Cuerpos de Seguridad del Estado.
Генералниот секретар на шпанската бискупска конференција, Франциско Гарсија на Твитер напиша дека „со голема болка ја примил веста за инцидентот во Алхесирас“.
„Ова се тажни моменти, нас нè обединува болката на семејствата на жртвите и на епархијата Кадиз“,
додаде тој.
Хозе Игнасио Ландалусе, градоначалникот на Алхесирас, за денеска прогласи ден на жалост во градот и митинг пред црквата Нуестра Сењора де ла Палма напладне.
Градот Алхесирас се наоѓа на самиот југ на Шпанија и е едно од најважните пристаништа на таа земја.