Документот го потпишаа првите луѓе на Народната банка, Министерството за финансии, Комисијата за хартии од вредност, на советите на експерти на агенциите за супервизија на осигурување и за супервизија на капитално финансирано пензиско осигурување и на Фондот за осигурување депозити
Финансиските регулатори склучија Меморандум за меѓуинституционална соработка, со цел зајакнување на соработката во следењето на состојбите во финансискиот систем и одржување финансиска стабилност, во околностите што ги наметнува кризата со коронавирусот.
Меморандумот го потпишаа гувернерката на Народната банка, Анита Ангеловска-Бежоска, министерката за финансии, Нина Ангеловска, претседателката на Комисијата за хартии од вредност Нора Алити, претседателот на Советот на експерти на Агенцијата за супервизија на осигурување Крсте Шајноски, претседателот на Советот на експерти на Агенцијата за супервизија на капитално финансирано пензиско осигурување Максуд Али и директорот на Фондот за осигурување депозити Борче Хаџиев. Документот се изготвувал во изминатите неколку месеци, во согласност со препораките на Меѓународниот монетарен фонд и Светската банка.
„Меморандумот се склучува со цел, преку поголема координираност на регулаторите, и натаму навремено и ефикасно да се идентификуваат системските ризици и навремено и усогласено да се преземаат активности за спречување и намалување на нивното влијание врз финансискиот систем. Со активностите што се предвидени со меморандумот, отпорноста на нашиот финансиски систем на шокови ќе биде дополнително зајакната и надлежните институции со уште поголема подготвеност ќе управуваат со предизвиците за системот“,
се наведува во соопштението.
Меѓу другото, се посочува, согласно со одредбите на Меморандумот, се унапредува улогата и се проширува составот на Комитетот за финансиска стабилност, по примерот на Европскиот одбор за системски ризици.
„Досега Комитетот го сочинуваа само претставници на Народната банка и на Министерството за финансии. Отсега, во работата на Комитетот учествуваат сите регулатори на финансискиот систем, а негов национален координатор е гувернерката на Народната банка. Во рамки на Комитетот, ќе функционираат и два поткомитетa, како оперативни тела – поткомитет за следење на системските ризици и предлагање макропрудентни мерки и поткомитет за подготовка за управување со финансиска криза. Заради остварување на поставените цели, давање препораки и преземање соодветни активности, преку Комитетот координирано ќе се следат анализите за состојбите во финансискиот систем, како и регулативата што може да има влијание врз финансиската стабилност“
стои во соопштението.