Полицијата испукала и неколку проектили во обид да го сопре М.А., кој го приредил инцидентот за време на полицискиот час, по што е уапсен
Жител на тетовското село Пирок е уапсен по бркотница со полицијата за време на полициски час, која почнала во Гостиварско, а завршила во тетовско Сиричино. При тоа, 33-годишникот повредил полицаец, оштетил полициски возила и наплатна рампа.
„М.А (33) од тетовски Пирок, управувајќи патничко возило ‘фолксваген пасат’ со германски регистарски ознаки, во кое подоцна се откриени остатоци од бела прашкаста материја, најпрво не застанал на полициски знак во гостиварските села Топлица и Врапчиште и продолжил да бега. Во еден момент, враќајќи се наназад, со возилото удрил во полициски службеник и го повредил“,
соопшти СВР Тетово.
Тој продолжил да бега по автопатот Гостивар-Тетово.
„Тој ја оштетил наплатната рампа, се упатил кон тетовско Желино и по локалниот пат за Сиричино, а попатно удрил и оштетил и две службени возила на МВР. Во знак на предупредување да застане, полициските службеници испукале неколку проектили. Потоа во тетовско Сиричино, полициски службеници на СВР Тетово го лишиле од слобода“,
информира тетовската полиција.
Како што информираат од полицијата, лицето е приведен во полициската станица во Тетово и по целосно расчистување и документирање на случајот ќе му бидат изготвени поднесоци за неколку кривични дела.