Првото трансплантирано срце од синоќа чука во телото на 54 годишен пациент. Во моментов во тек е трансплантација на бубрези од истиот донор
Министерот за здравство Венко Филипче го посети пациентот на кого синоќа успешно му беше трансплантирано срце од починат донор, информираат од Министерството за здравство.
Трансплантацијата на срце за прв пат во земјава се изврши синоќа на Клиниката за кардиохирургија и траела околу шест часа, по што почнало да чука срцето во телото на 54 годишниот пациент.
Од Министерството за здравство информираат дека два бубрега од истиот донор во моментов се трансплантираат на Клиниката за Урологија кај двајца пациенти со хронична бубрежна слабост кои со години биле на дијализа.
Министерот за здравство Венко Филипче изрази благодарност до семејството на донорот и нивната одлука за дарување на органи ја оцени како херојски чин.
Трансплантацијата на срце ја изведе тим хирурзи составен од Сашко Јовев од Државната кардиохирургија, Жан Митрев од приватната Клиника „Жан Митрев“ и Александар Николиќ од Клиниката „Систина“ и анестезиологот од КАРИЛ Маја Мојсова.