Нејзиниот тест во една третина е парцијално позитивен, но Филипче вели тоа може да е вкрстена реакција од други вируси и верува дека на крајот ќе се покаже негативен резултат
Жена што се вратила од патување од Рим во моментов се испитува дали е заразена со коронавирус на Инфективната клиника во Скопје, информираше денеска министерот за здравство Венко Филипче. Нејзиниот тест во една третина е парцијално позитивен, но Филипче вели тоа може да е вкрстена реакција од други вируси и верува дека на крајот резултатот ќе биде негативен.
Во текот на вчерашното ден на скопската клиника бил примен и еден маж – возач на камион, кој патувал од Северна Италија и имал симптоми на грип, но тестирањето покажало дека нема коронавирус.
Во меѓувреме, надлежните ги лоцираат сите луѓе со кои стапиле во контакт сопатниците на педесетгодишната жена кај која вчера беше потврден коронавирусот. Како што информира Филипче, пациентката во моментов е во добро состојба, а сите што патувале со неа во истото комбе од вчера се ставени во домашна изолација.
„Ги контактиравме сите лица со кои имале контакт патниците од комбето во кое патувале заедно со заразената жена со коронавирусот. Добро е тоа што скоро сите ни кажаа дека немале контакт со голем број луѓе, најчесто биле само со семејствата со кои живеат. Сите тие ќе бидат во домашна изолација“,
изјави Филипче.
Надлежните ќе ја следат состојбата на сите што се во домашна изолација, па ќе одлучат дали ќе останат дома или ќе бидат сместени во болничките простории за изолација.
Поврзани вести:
Коронавирус: Разбивање на митовите
Коронавирус – наједноставниот начин за идентификација
Филипче: Заразената пациентка е добро, другите патници се познати и од вечерва ќе бидат во изолација