По изјавата на поглаварот на Исламската верска заедно (ИВЗ), Сулејман Реџепи, дека ако не добие помош од државата, ќе ги суспендира мерките од Владата за забрана за движења и собири, министерот Венко Филипче порача дека мерките мора да се почитуваат и оти сите треба да издржат, иако доаѓа период на празници.
„Ова е еден период во кој мора да се издржи. Ова се сериозни мерки за рестрикција, меѓутоа крајната цел е да се заштити здравјето на граѓаните. Јас верувам дека сите се свесни за сериозноста на ситуацијата и дека секој гледа низ призма на својот професионален и личен капацитет и треба да се заложи максимално до сите граѓани до кои допира да стигне порака дека овие мерки мора да се почитуваат. Знам дека е тешко, доаѓаат и верски празници, но ова е период во кој сите мора да се стрпиме и издржиме, мора да инвестираме во сопственото и колективното јавно здравје“,
рече Филипче, нагласувајќи дека паралелно со здравствениот, работи и економскиот тим кој носи мерки за погодените од кризата.
Одговорот на министерот даден на новинарско прашање е откако Реџепи се пожали дека ИВЗ барала помош од Владата, но не добила одговор, при што порача дека може да ги повика верниците повторно да доаѓаат во џамиите и тогаш нема да има сила што ќе ја спречи епидемијата.
*Поврзани вести:
Реисот Реџепи: Ако Владата не ни даде помош, ќе ги повлечеме забраните и ќе станеме Бангладеш
Сулејман Реџепи може да одговара и кривично ако повика да не се почитуваат мерките