Лидерот на опозициската ВМРО-ДПМНЕ Христијан Мицкоски пак, обвини дека Владата нема план за вакцините и не може да ги примени ниту подарените
Не постои законска пречка за прием на вакцините против ковид-19 во нашата земја. Првите дози на вакцината „Фајзер“ која е договорена во директни преговори со производителот, како и 8 000 дози вакцини кои од Србија треба да пристигнат во нашата земја ќе бидат со интервентен увоз, вели министерот за здравство Венко Филипче.
Измената на Законот за лекови, вели е поради глобалната политика на „Фајзер“ кои инсистираа апликант за регистрацијата на вакцината да биде нивното претставништво кое е со седиште во Холандија, одговорно за овој дел на Европа.
„Нема пречка за увозот на вакцините од Србија. Првите вакцини од Фајзер и од Србија ќе стигнат со интервентен увоз. Планот за вакцинација е подготвен. Спремни сме со нашата инфраструктура, фрижидерите веќе се инсталирани и може да се складира огромна количина на вакцини. Во моментот кога ќе пристигнат вакцините имаме план по којшто ќе постапуваме, здравствените работници се први“,
вели Филипче.
Производителот „Фајзер“, потенцира министерот, излезе во пресрет, несакајќи да се забави динамиката на пристигнување на вакцините и се согласил регистрацијата да биде за следните количини.
„Со оглед на тоа што инсистираат регистрацијата да се случи кога тогаш, несакајќи да ја забават динамиката на пристигнување на вакцините, се согласија тоа да биде за следните количини, во следните месеци поради тоа што ние поднесовме измена на Законот за лекови во Собранието за да овозможиме, оваа конкретна вакцина да се регистрира преку апликант кој не е регистриран како компанија во нашата земја“,
појаснува Филипче.
Што се однесува до испораката на вакцините од Србија, Филипче нагласува дека во моментов се чека одобрување од компанијата „Фајзер“ за интервентен увоз.
„Во интензивна комуникација сме со компанијата изминатите два дена, паралелно на нашите разговори во врска со нашиот директен договор, сега се чекаат и фајловите за да се дозволи таа количина од Србија да биде пратена во нашата земја. Тоа значи дека компанијата „Фајзер“ води сметка за буквално сите количини кои ги дистрибуира во земјите, дали и на кој начин евентуално се препраќаат во некои други земји“,
додава министерот.
Во врска со измените на Законот за лекови, Филипче, како што информираат од Министерството за здравство, изминатиов период имаше средби со пратеници на опозицијата кои во разговор со него изразија поддршка и конструктивност за измените на Законот.
Што се однесува до вакцините кои во земјава треба да стигнат преку Ковакс механизмот, министерот посочува дека на 29 јануари ќе има состанок со претставниците од тој систем кога се очекува да добие информации кога и во кои количини вакцини ќе стигнат во нашата земја.
Брнабиќ: Ќе и помогнеме на С Македонија во регистрација на вакцината
Српската премиерка Ана Брнабиќ изјави дека Србија сака да им помогне на околните земји во однос на вакцинацијата против коронавирусот, потсетувајќи дека претседателот Александар Вучиќ и премиерот на Северна Македонија Зоран Заев се договориле Србија да и помогне на С.Македонија со 8 000 дози.
Таа за Тв Хепи изјави дека задачата на Владата на Србија за помош на земјите од регионот е дадена од претседателот Александар Вучиќ, со образложение дека „ако нашите граѓани се вакцинираат, а нашето соседство нема вакцина и не е среќно, не можеме ниту ние да напредуваме.“
Брнабиќ изрази уверување дека вакцината од ЕУ ќе дојде не само во Србија, туку и на целиот Балкан, потсетувајќи колку е тешка ситуацијата за борбата за вакцините.
„Србија помага и во регистрирањето на вакцините во Северна Македонија и на таа соседна земја и е понудено лекарите од црвената зона да дојдат во Србија и да се вакцинираат тука“,
кажа Брнабиќ
Мицкоски: Толку се неспособни што дури и подарени вакцини не може да ги применат
Лидерот на опозициската ВМРО-ДПМНЕ Христијан Мицкоски пак, во објава на Фејсбук оцени дека Владата нема план за вакцините и не може да ги примени ниту подарените.
„Пред еден месец кога Бугарија соопшти дека ќе ни подари вакцини против корона, тоа го поздравив и прашав дали Владата има воопшто план? Денес го добивме одговорот декa нема. Имено премиерката на соседна Србија, Брнабиќ кажува дека и покрај тоа што одлучиле да помогнат со 8 илјади вакцини процесот е закочен зошто вакцината не е регистрирана и има отсуство на план за регистрација. Со други зборови, додека светот оди напред, нашата Влада го губи времето, додека народот умира на рати. Толку се неспособни што дури и подарени вакцини не може да ги применат. Што правеа додека регионот планираше и бараше вакцини?“,
напиша Мицкоски на својот фејсбук профил.