Министерот за здравство, Венко Филипче, на својот профил на Фејсбук реагираше на обвинувањата од генералниот секретар на ВМРО-ДПМНЕ, Игор Јанушев, кој рече дека нема доволно заштитна опрема за медицинските работници.
„Одговорно тврдам дека ништо не недостасува, а има и доволни количини во резерва. Игор Јанушев, исто како и Мицкоски се обидува да ја изманипулира јавноста. Минатиот пат, Мицкоски свесно манипулираше дека нема тестови, а овој пат лагата е дека нема заштитна опрема за медицинскиот персонал“,
вели Филипче.
*Поврзана вест: Јанушев: Итно да се одвојат 10 милиони евра за заштитна опрема за лекарите
Јанушев обвини дека има недостиг од визири, ракавици и заштитни маски и побара итно да се одвои фонд од 10 милиони евра, што ќе биде наменет за набавка на заштитна опрема.
„Минатата недела е направена инспекциска контрола во 79 здравствени установи од страна на Државниот здравствен и санитарен инспекторат и во ниедна не е забележан недостиг на опрема“,
напиша Филипче.
Во тек е набавка, додаде Филипче, за дополнување на резервите за што е распишана покана за јавна набавка објавена на веб-страницата на Министерството за здравство и тоа за: 12.000 маски N95 или сличен стандард, 20.000 скафандери, 500.000 хируршки маски, 5.000 визири и 1.200 гумени скафандери.
*Поврзана вест: МЗ: Заштитна опрема има, обвинувањата од Јанушев се паушални
„Не ја разбирам потребата постојано да се лаже и манипулира јавноста на тема која и онака ги држи граѓаните во страв и неизвесност. Ова однесување на опозицијата не носи добро никому и многу одмага во борбата со коронавирусот“,
објави Филипче на својот Фејсбук профил.
Јанушев исто така побара државата да склучи договори со домашните текстилни фабрики кои се соочуваат се откажување на договори за работа и преку нив да се обезбедат 100.000 скафандери, 100.000 визири и 1.000.000 заштитни маски, но и да се направи интервентен увоз на 1.000.000 ракавици, што според него ќе се помогне домашната текстилна индустрија.
