Предлогот наишол на вџашеност кај останатите членки на Унијата, а некои го опишале како потполно нереален со оглед на економските и политичките предизвици во регионот, пишува весникот
Словенија, која е актуелен претседавач со ЕУ, предлага Унијата да се прошири со сите земји од Западен Балкан до крајот на оваа деценија, 2030 година, што доаѓа во пресрет на Самитот ЕУ-Западен Балкан следната недела, пишува „Фајненшл тајмс“, пренесува „Нова.рс“.
Предлогот бил даден пред три дена на состанок на амбасадорите во Брисел и наишол на вџашеност кај останатите членки на Унијата. Некои го опишале како потполно нереален со оглед на економските и политичките предизвици во регионот.
„Проширувањето е чувствително прашање за ЕУ која е поделена околу прашањето за проширувањето и брзината со која на земјите треба да им се дозволи влез во блокот“,
пишува весникот и додава дека Унијата е под притисок да ги продолжи преговорите за проширување со балканските земји кои, исто така, се свртуваат и кон Кина и Русија.
По брзото проширување кога ЕУ прими 13 нови членки помеѓу 2004 и 2013 година, тогашниот претседател на Европската комисија, Жан Клод Јункер, изјави дека нема да има прием на нови пред 2019 година, а земјите кои бараат членство станаа сè понестрпливи со одолговлекувањата од Брисел.
Самитот ЕУ-Западен Балкан ќе се одржи на 6 октомври во Словенија, а на него ќе учествуваат водечките земји членки на ЕУ и шесторката од Западен Балкан: Албанија, Босна и Херцеговина, Косово, Црна Гора, Северна Македонија и Србија.
Како што пишува „Фајненшл тајмс“, дипломатите од земјите-членки на Унијата, претежно од југоисточниот блок на ЕУ, сакаат Брисел да ги забрза преговорите со Западен Балкан и се залагаат да има амбициозен наратив за проширувањето на претстојниот Самит, но и признаваат дека одредувањето на цврст датум за пристапување е политички експлозивно прашање.
„Потребна ни е декларација, тоа е многу важно“,
изјавил еден дипломат од ЕУ и додал дека декларација со конкретен датум нема да биде прифатена.
Весникот укажува и на тоа дека ставот на ЕУ кон регионот дополнително се комплицира со тоа што пет членки (Кипар, Грција, Романија, Словачка и Шпанија) не го признаваат Косово кое прогласи независност од Србија во 2008 година.
Актуелната претседателка на Европската комисија (ЕК), Урсула фон дер Лајен, во пресрет на Самитот го посети регионот и ја повтори поддршката за влез на земјите во Унијата.
Политичарите во регионот, пишува „Фајненшл тајмс“, на таа тема гледаат со голема фрустрација, додека апетитот за идно проширување е мал во повеќе од поголемите земји членки на ЕУ.
ЕК, пак, им укажа на националните влади дека што поскоро треба да се оствари напредок со Албанија и Северна Македонија. Овие две земји требаше да почнат преговори за членство минатата година, но напредокот по тоа прашање и понатаму е блокиран поради недостатокот на едногласна поддршка од земјите членки.