Неодамна, граѓански активисти на јавна трибина во Неготино му порачаа на премиерот Зоран Заев дека не сакаат т.н зелена гасна централа која ќе согорува комунален отпад во нивна близина
Владата денеска на седница донесе Одлука за утврдување статус на стратешки инвестициски проект на Друштво за трговија и услуги „Зока енерџи солушн увоз“ од Неготино.
„Одлуката е донесена врз основа на предлогот на Комисијата за стратешки инвестициски проекти која што го разгледа целокупното барање и документација и изврши техничка, финансиска и правна процена на досието на проектот за проектот ‘Фабрика за производство на зелена енергија’ и врз основа на утврденото дека проектот ги исполнува условите согласно Законот за стратешки инвестиции да се стекне со статус на стратешки инвестициски проект“,
соопшти владината прес-служба.
Претходно граѓански активисти на јавна трибина во Неготино му посочија на премиерот Зоран Заев дека не сакаат т.н зелена гасна централа која ќе согорува комунален отпад во нивна близина. Премиерот, пак, ги уверуваше граѓаните дека фабриката ќе го реши загадувањето од нелегалните и дивите депонии, дека ќе се спречи емисијата на отровни гасови, ќе се запре загадувањето на почвата и подземните води, а ќе нема ниту неконтролирани пожари во депониите.
Според тоа што го објасни премиерот, станува збор за инселератор кој ќе работи без оџак, односно ќе биде од затворен тип, по примерот на Љубљана, Лондон и други европски градови.
Според достапните податоци од Централниот регистар, единствен сопственик на „Зока Енерџи Солушн“ е физичкото лице Филип Блажев. Компанијата е основана лани, со основачки влог од минималните 5 000 евра.