Овој проект е дел од Интервентниот план за инвестиции (ИПИ) за периодот од 2021-2027 година, кој Владата го презентираше кон крајот на мај. Како што и тогаш беше посочено, станува збор за инвеститор од Луксембург кој за согорувањето и преработката на отпадот би инвестирал 336 милиони евра
Здружението на граѓани „Ековита“ од Неготино, пак, изрази загриженост и излезе со став дека се против оваа фабрика. Активистите стравуваат и од тоа дека ќе се увезува отпад бидејќи инвеститорот нема да може да собере доволно во државата за да ги задоволи потребите
Премиерот Зоран Заев денеска на јавна трибина во Неготино побара поддршка од неготинци за фабриката за обработка на отпад бидејќи, како што тврди, тоа ќе го реши загадувањето од нелегалните и дивите депонии, ќе се спречи емисијата на отровни гасови, ќе се запре загадувањето на почвата и подземните води, а ќе нема ниту неконтролирани пожари во депониите.
„Како во напредните европски земји ќе се создадат капацитети за трансформација на отпадот во обновлива енергија и суровини. Инвестиција ќе го поттикне економскиот развој со отворање на нови работни места, ангажирање на голем број локални компании и со оваа инвестиција ќе се зголеми можноста за намалување на користењето на фосилни горива“,
изјави Заев.
Според тоа што го објасни премиерот, станува збор за инселератор, ќе работи без оџак односно ќе биде од затворен тип, по примерот на Љубљана, Лондон и други европски градови.
„Нема издувен дел којшто излегува надвор за да има загадување. Целосно затворен систем којшто по дејство на топлина го разложува органскиот отпад и го преработува во три гасни супстанции кој понатаму ја создадат топлинската енергија која како топла вода ја врти турбината и од неа произведува електрична енергија. Тоа е целиот систем, нема излез. Најмалку седум посто останува пепел којшто се употребува во градежништвото, почнувајќи од бекатон плочки, цементирани подлоги, асфалтирање, тампонирање“,
рече Заев.
Овој проект е дел од Интервентниот план за инвестиции (ИПИ) за периодот од 2021-2027 година, кој Владата го презентираше кон крајот на мај. Како што и тогаш беше посочено, станува збор за инвеститор од Луксембург кој за согорувањето и преработката на отпадот би инвестирал 336 милиони евра.
„Проектот ги опфаќа петте од вкупно осумте плански региони во државата согласно Стратегијата за отпад и согласно Рамномерниот регионален развој. Трајно и комплетно решение со отпадот за 74 проценти од територијата на државата. Директна инвестиција од 13,5 милиони евра за 100 комунални возила, инвестицијата и изградбата на 11 збирни и претоварни станици и дополнителни 11 збирни потстаници е во износ од 9,56 милиони евра, а инвестицијата во 6 000 метални и пластични комунални контејнери е 1,675 милиони евра“,
рече премиерот.
Во овој проект комуналните претпријатија ќе имаат обврска да плаќаат по околу 20 евра за еден тон депониран смет. Очекувањата кои ги сподели Владата кога пред повеќе од еден месец го претстави проектот, се дека годишно од овие региони ќе се собираат 700 000 до 1 милион тони отпад.
Здружението на граѓани „Ековита“ од Неготино, пак, изрази загриженост и излезе со став дека се против оваа фабрика.
„Не сакаме т.н зелена гасна централа која ќе согорува комунален отпад, на неготинци не им треба таква енергија од отпад, вака се изјаснија и тие што ги анкетиравме во градот и две села“,
истакна претседателот на здружението, Сашко Тодоров.
Активистите стравуваат од тоа дека ќе се увезува отпад. Како што рече Тодоров, според информациите со кои располагаат, од најавената инвестиција во Дуброво за горење на комуналниот отпад, се очекувало да се собираат и третираат помеѓу 700 000 и 1 милион тони годишно отпад, па проблемот тука е што од податоците на Заводот за статистика за 2020 година, од пет плански региони или 48 општини, се собира само 334 404 тони комунален отпад, или во цела Македонија вкупно 630 096 тони отпад.
„Постои опасност, инвеститорот за да ги задоволи своите потреби на централата, милион тони годишно отпад, да увезува отпад и тоа ќе го чини многу поевтино отколку да го собира и селектира од Македонија. Градот на грозјето ќе биде град на отпадот“,
рече претседателот на „Ековита“.