Европратениците ги одобрија и амандманите 75б, 79 и 80, за кои Институтот за европска политика (ЕПИ) и неколку други регионални невладини организации предупредија дека претставуваат поткопување на основните стандарди и вредности на ЕУ
Европарламентарците попладнево со 508 гласа „за“ и 56 „против“ го усвоија Извештајот за напредокот на Северна Македонија за 2021 година на известувачот Илхан Ќучук, јави МИА од Брисел.
Извештајот го поздравува реформскиот напредок на земјата и инсистира на имплементација на Договорот за добрососедство со Бугарија.
Европратениците ги одобрија и амандманите 75б, 79 и 80, за кои Институтот за европска политика (ЕПИ) и неколку други регионални невладини организации предупредија дека претставуваат поткопување на основните стандарди и вредности на ЕУ.
Амандманот 75б се однесува на историското помирување и „заедничка историја“, со што, според ЕПИ, Европскиот парламент го одобрува притисокот што го врши Бугарија за да се толкува историјата на нејзин начин.
Амандманот 79, кој исто така е усвоен, се оценува како притисок врз заедничката Комисија за историски и образовни прашања, која треба да работи независно и без никакви политички притисоци.
Амандманот 80 се коси со проценката на Европската комисија бидејќи гласи оти нема напредок во имплементацијата на Договорот за пријателство меѓу земјава и Бугарија од 2017 година, што не е став на Европската комисија во нејзиниот последен извештај во 2021, предупреди ЕПИ.
Освен тоа, неколку европратеници од бугарската националистичката партија ВМРО-Бугарско национално движење во текот на расправата пред гласањето ја нарекоа Северна Македонија „геноцидна кон Бугарите“.
Европратеникот Андреј Слабаков дури оцени дека без бараните бугарски промени членството на Северна Македонија е рамно на „тумор за ЕУ“.
Министерството за надворешни работи го поздравува усвојувањето на Резолуцијата на Европскиот парламент за Република Северна Македонија на денешната пленарна седница во Стразбур.
Според МНР, особено е важно што Европскиот парламент ја реафирмира стратешката важност на Северна Македонија и целиот регион на Западен Балкан и нивната иднина како дел од Европското семејство, при што се истакнува дека почетокот на пристапните преговори и членството во ЕУ е силна инвестиција за стабилност, не само за земјите од регионот, туку и за ЕУ, особеново во актуелниот безбедносен контекст во Европа.
Министерот за надворешни работи Бујар Османи вчера како одговор на новинарско прашање рече резолуцијата на Европскиот парламент за Извештајот за напредокот на земјава за 2021 година не е директно поврзана со ветото, туку тоа е став на европратениците, додека одлуката за вето ја носи Советот на ЕУ.