Бугарскиот дневен весник „Дума“ наведува дека некои во Брисел мислат дека „Мини Шенген“ е еден вид интеграциски сепаратизам, кој наместо европска алијанса, создава балкански сојуз
Европски медиуми констатираат дека почна создавањето на економскиот шенгенски простор на Западен Балкан преку иницијативата „Отворен Балкан“, при што истакнуваат дека лидерите на Албанија, Северна Македонија и Србија се обидуваат да го постигнат тоа бидејќи веруваат дека перспективите на регионот за членство во ЕУ остануваат неизвесни.
Додека претставници на ЕУ во Брисел посочуваат дека Еди Рама, Зоран Заев и Александар Вучиќ „тропаат на отворена врата“, бидејќи лидерите на Унијата проценија дека заедничкиот пазар на Западен Балкан ќе придонесе за приклучување на регионот кон ЕУ, италијанскиот весник „Стампа“ смета дека причините за тоа се одложувањето на преговорите за членство, прекршени ветувања и растечкото разочарување на регионот во Брисел, пренесува агенцијата Бета.
Слично како и другите коментари, „Стампа“ подвлекува дека честопати спротивставените земји во регионот одлучија да создадат свој Шенген, како можна алтернатива на магливата европска химера, односно да го отворат патот за непосредна благосостојба на Балканот.
Францускиот весник „Либерасион“ проценува дека оваа иницијатива им овозможува на Албанија, Северна Македонија и Србија јасно да спроведат интеграција … што е многу далеку од она што се случува кога станува збор за Европската Унија, која постојано го отежнува прикажувањето јасни перспективи за членство, што во тие балкански земји го всади чувството дека седат во чекална чии врати никогаш нема да се отворат.
„Либерасион“ додава дека Рама, Заев и Вучиќ поканиле и други земји во регионот да се приклучат кон „Отворен Балкан“, но забележува дека другите досега одбивале и вели дека косовскиот левичарски националистички премиер Албин Курти рече дека претпочита да се приклучи на Берлинскиот процес.
Бугарскиот дневен весник „Дума“ наведува дека некои во Брисел мислат дека „Мини Шенген“ е еден вид интеграциски сепаратизам, кој наместо европска алијанса, создава балкански сојуз. „Дума“ заклучува дека ЕУ мора да биде задоволна што разочарувањето на трите земји поради бавната европска интеграција ќе го ублажи мини-економската асоцијација.
Словенечкиот весник „Дневник“ индиректно е вклучен во оваа дискусија, истакнувајќи дека земјите од Западен Балкан не бегаат од сознанието дека самата Европска Унија почна да се дели на бугарско-романска ЕУ и германска Унија, додека Вишеградската група е создадена западно од Србија.
Според „Дневник“, Вишеградската алијанса се разликува од Брисел по своите вредности, а на запад од ЕУ, старите членки постепено ја градат својата Северна Европа и на југот мислат само како на различни летни одморалишта. И, како што заклучува весникот во Љубљана, Европската Унија изгледаше вечна, но се покажа дека е само привремена, како и другите форми на здружување.
Британскиот весник „Фајненшл тајмс“ пишува дека дури и да започнат преговорите со Тирана и Скопје, политичката волја за проширување на ЕУ е многу слаба меѓу моќниците на европскиот блок, особено затоа што германската канцеларка Ангела Меркел, поборник за вклучување на Балканот, заминува од власт во септември.
„Сите тројца балкански лидери (Рама, Заев и Вучиќ)“, истакнува „Фајненшл тајмс“, „сфатија дека ќе треба да чекаат за ЕУ, додека САД ги поддржуваат нивните напори“, пишува британскиот весник на што посебно укажа албанскиот премиер Рама.