Конференцијата на високо ниво ќе биде отворена за земјите-членки на ЕУ, соседните земји, членките на Обединетите нации, меѓународните финансиски институции и други релевантни чинители, а целта е да се соберат средства за поддршка на двете земји за брзо закрепнување по разорниот земјотрес
Европската Унија во март во Брисел ќе организира донаторска конференција за Турција и Сирија кои во понеделникот беа погодени од разорен земјотрес, соопшти денеска ЕУ.
Конференцијата, како што се наведува во соопштението, има за цел да мобилизира средства од меѓународната заедница за поддршка на народот на Турција и на Сирија по земјотресот.
„Конференцијата на високо ниво, која ќе биде отворена за земјите-членки на ЕУ, соседните земји, членките на Обединетите нации, меѓународни финансиски институции и други релевантни чинители, треба да го координира одговорот на донаторите и да собере средства за брзо закрепнување и помош во погодените области на Турција и Сирија од земјотресот“,
се вели во соопштението на ЕУ.
Организирањето на донаторската конференцијата го усогласија претседателката на Европската комисија (ЕК) Урсула фон дер Лајен и шведскиот премиер Улф Кристерсон, чија земја претседава со ЕУ.
Фон дер Лајен нагласи дека е активиран механизмот за цивилна заштита на ЕУ, кој досега испрати медицински и тимови за пребарување и спасување од 23 земји.
We are now racing against the clock to save lives together.
— Ursula von der Leyen (@vonderleyen) February 8, 2023
Soon we will provide relief aid, together.
Türkiye and Syria can count on the EU.
@SwedishPM and I will host a Donors' Conference early March in Brussels.
Let’s mobilise funds globally for the affected communities.
„Сите сме потресени од разорните последици од земјотресите што ги погодија Турција и Сирија оваа недела. Сега приоритет е да се работи деноноќно за да се спасат што повеќе животи, бидејќи многу луѓе се уште се заробени под урнатините“,
порача претседателката на ЕК.
Таа испрати порака дека ЕУ ќе ги поддржи народот на Турција и Сирија.
„Затоа што никој не треба да биде оставен сам кога таква трагедија ќе погоди една нација“,
рече Фон дер Лајен.
Шведскиот премиер Кристерсон истакна дека земјотресот што ги погоди Турција и Сирија е „катастрофа без неодамнешен преседан“.
Според последните податоци, вкупниот број на загинати во Турција и во Сирија по разорниот земјотрес во понеделникот се искачи на најмалку 12 049 лица.
Новите податоци доаѓаат откако сириската цивилна одбрана соопшти дека најмалку 1 730 луѓе загинале во северозападна Сирија, а повеќе од 2 850 се повредени.
Претходно, турскиот претседател Реџеп Таип Ердоган соопшти дека црниот биланс од земјотресот во неговата земја се искачи на 9 057 луѓе.