Зградите во Италија ќе се соочат со дополнителни 15 дена без централно греење. Дел од другите европски земји веќе воведоа мерки за справување со енергетската криза, како што е ограничување на греењето на максимум 19 степени, задолжително затворање на вратите во продавниците што се климатизирани, исклучување на осветлувањето на фасадите, спомениците, излозите…
Централното греење оваа зима ќе биде ограничено во Италија, земјата која меѓу последните презема мерки за да се справи со недостигот од снабдување гас во Европа, предизвикан од руската инвазија на Украина.
Според владината уредба, пренесува Би-би-си, зградите во Италија ќе се соочат со дополнителни 15 дена без централно греење. Исто така, на Италијанците им е кажано да го намалат греењето за еден степен и дополнително да го исклучуваат парното по еден час дневно.
Некои згради ќе бидат ослободени од оваа уредба, како што се болниците.
Ваквиот потег на италијанските власти доаѓа додека и другите влади ширум Европа се обидуваат да ја намалат побарувачката на енергенси и да ги зајакнат резервите во пресрет на зимата.
Многу од европските земји досега беа зависни од рускиот гас, кој беше ограничен откако Русија реши да изврши воена агресија врз Украина.
Пред руската инвазија, токму Италија беше вториот најголем увозник на гас од Русија во ЕУ. Во месеците по инвазијата земјата почна да ја намалува зависноста свртувајќи се кон други извори на енергија и течен природен гас.
Со новите мерки на италијанските власти, различни се и реакциите на граѓаните со оглед дека растат и сметките.
„За старите луѓе кои ќе поминуваат дома многу време, веројатно ова ќе биде проблем“;
„Веројатно ова е потребно но е тешко. Сега кога оваа криза нè погодува лично нас, многу луѓе кои ги поддржуваат санкциите кон Русија може да го променат своето мислење“,
велат граѓани во анкета за Би-би-си.
Слични планови за заштеда на енергија воведоа или најавија и повеќе европски влади.
Во Франција, на пример, домовите и деловните простории ќе се загреваат на максимум 19 степени Целзиусови, нема да има топла вода во јавните згради, а ќе се намали и температурата во базените и спортски сали. Забраната која ја наметнаа француските власт за оставање на отворени врати во продавниците кои се климатизирани е продолжена низ цела земја.
Шпанија, исто така, претходно веќе наложи греењето да не биде на повеќе од 19 степени Целзиусови, како и дека треба да се затвораат вратите за да не се троши топлината. Шпанските власти наредија и осветлувањето на излозите да се исклучува по 22 часот.
Германија го исклучи осветлувањето на јавните споменици и на фасадите на зградите кое беше поставено од естетски причини, а тамошните власти предупредија и оти може да дојде до исклучување на греењето во влезовите, ходниците и фоајеата на јавните згради.