Холандија во полуфиналето ќе игра против Англија в среда. Втората полуфинална двојка ја сочинуваат Франција и Шпанија
Холандија е последниот полуфиналист на Европското фудбалско првенство 2024, откако вчеравечер ја совлада Турција во четвртфиналниот дуел во Берлин со 2-1, иако на полувреме репрезентацијата предводена од Роналд Куман губеше со резултат 0-1.
Самет Акајдин ја донесе Турција во водство во 35. минута, а Арда Ѓулер на средина од второто полувреме пропушти голема шанса да го удвои водството, откако неговиот удар ја погоди стативата.
Казната дојде на спротивната страна во 70. минута кога дефанзивецот од редовите на Интер, Стефан де Вриј, го израмни резултатот.
Само шест минути подоцна Холандија дојде до целосен резултатски пресврт со автоголот на Мерет Мулдур, но во кој голема улога играше Коди Гакпо, најдобриот поединец на Холандија досега на ова првенство.
Завршницата на дуелот на Олимпискиот стадион во Берлин беше драматична, во која Турција не успеа да реализира ниту една од многуте колосални шанси и да го однесе натпреварот во продолженија. Од четвртфиналните дуели, само Холандија успеа своето место да го резервира во полуфинале во регуларен дел од 90 минути.
Холандија во полуфиналето ќе игра против Англија вo среда. Втората полуфинална двојка ја сочинуваат Франција и Шпанија, a тој натпревар ќе се одигра во вторник во 21 часот.