Од компанијата посочуваат дека активно работат на решавање на проблемот и оти се во постојана комуникација со службите на Град Скопје со цел, како што велат, изнаоѓање заедничко решение за санирање на проблемот
Стартот на грејната сезона скопјани ќе ја дочекаат со топли радијатори, уверуваат од државната „Електрани на Северна Македонија“ (ЕСМ) велејќи дека започнале со подготвителните активности за санација на цевководот на мостот „Беласица“ кој беше оштетен по пожарот кој избувна на мостот на 12 мај годинава.
Посочуваат дека оштетените цевки се успешно отстранети и се донесени нови кои сега треба да се монтираат.
Од компанијата посочуваат дека активно работат на решавање на проблемот и оти се во постојана комуникација со службите на Град Скопје со цел, како што велат, изнаоѓање заедничко решение за санирање на проблемот.
„Додека трае поставувањето на новите цевки ќе се користи алтернативниот вод на железничкиот мост кој има капацитет да се врши континуирана испорака на топлинска енергија до потрошувачите“,
велат од ЕСМ.
Нагласуваат оти поставувањето на новите цевки е комплексна активност која бара сериозна посветеност, а во оваа смисла велат дека ќе вложат максимални напори за санацијата да заврши во најкус можен рок.
Минатата недела скопската градоначалничка Данела Арсовска изјави дека Град Скопје нема надлежност да му наложи на ЕСМ во одреден рок да го санира мостот и да го постави новиот цевковод.
Прашана зошто работници од ЕСМ биле спречени да работат на мостот минатата недела, Арсовска рече оти немале соодветна документација за работа за постапување со тешки товарни возила.