Од државната компанија ги демантираат написите во медиумите дека резервите на гас за топланите „Исток“ и „Запад“ завршуваат, а нема најави за нова набавка. Оттаму информираат дека за декември е обезбеден природен гас од „Макпетрол пром – гас“ и топлинска енергија од ТЕ-ТО
Испораката на топлинска енергија тече непречено и така и ќе продолжи и во следниот период, велат од „Електрани на Северна Македонија“ демантирајќи ги написите во медиумите дека резервите на гас за топланите „Исток“ и „Запад“ завршуваат денеска, а нема најави за нова набавка.
Од државната компанија информираат дека за месец декември е обезбеден природен гас од „Макпетрол пром – гас“ и топлинска енергија од ТЕ-ТО.
АД ЕСМ, како што додаваат оттаму, продолжува со практиката за набавка на природен гас во покуси временски периоди поради финансиски подобрите услови.
„Ги демантираме написите на ТВ Телма дека гас има за еден ден. Редакцијата пред два доби одговор од АД ЕСМ дека компанијата располага и со гас и со средства за набавка на гас и дека нема никакви проблеми околу испораката на греење за Скопје во следниот период“,
стои во соопштението од АД ЕСМ.
Од „ЕСМ Снабдување со топлина“ вчера соопштија дека во тек е изработка на фактурите за топлинска енергија за октомври, со постапка за преземање на податоците на потрошувачите од страна на „ЕСМ Снабдување со топлина” од претходниот снабдувач со топлинска енергија „Снабдување со топлина Балкан енерџи”.
Регулаторната комисија за енергетика пред почетокот на грејната сезона издаде лиценци за регулирано производство на топлинска енергија, за дистрибуција на топлинска енергија и за снабдување со топлинска енергија на ЕСМ.
Сега државната компанија преку овие претпријатија се грижи скопјани да имаат топли радијатори откако во јуни годинава РКЕ донесе одлуки со кои престанаа да важат одлуките за издавање лиценца за вршење енергетска дејност снабдување, односно дистрибуција на топлинска енергија на компанијата БЕГ.