Според соопштението на руското Министерство за одбрана, експлодирале резервите на муниција на рускиот брод
Воениот брод „Москва“ се прослави на почетокот на војната кога украинските бранители на Змискиот Остров ги отфрлија повиците да се предадат, пред тие на крајот да бидат заробени
Руското Министерство за одбрана соопшти дека експлозија на крстосувачкиот број „Москва“, предводник на Црноморската флота, сериозно го оштетила бродот. Русија не ја соопшти причината за пожарот, но претходно Украина соопшти дека тој бил погоден од нивните сопствени проектили „Нептун“.
Според соопштението на руското Министерство за одбрана, експлодирале резервите на муниција на рускиот брод, на кој му пркосеа украинските војници на почетокот на војната.
„Муницијата на крстосувачот ‘Москва’ е активирана како резултат на пожар на воениот брод. Бродот е сериозно оштетен. Целиот екипаж е евакуиран. Причините за пожарот се истражуваат“,
се вели во соопштението.
Но, претходно вчера гувернерот на Одеса објави дека бродот е погоден од украинските ракети.
„Потврдено е дека ракетниот крстосувач ‘Москва’ денеска отиде токму таму каде што беше испратен од нашите граничари на Змискиот Остров!“,
напиша регионалниот гувернер на Одеса, Максим Марченко, на Телеграм.
Украинските власти соопштија дека Русија се обидува да ги спаси околу 510. членови на екипажот.
Воениот брод „Москва“ се прослави на почетокот на војната кога украинските бранители на Змискиот Остров ги отфрлија повиците да се предадат, пред тие на крајот да бидат заробени.
Крстосувачот „Москва“ тогаш се приближи до украинскиот Змиски Остров, карпест остров во Црното Море, барајќи од војниците веднаш да се предадат. Но, тие одбија да го сторат тоа, а потоа станаа познати во светската јавност по тоа што еден од нив им порачал на руските војници на бродот: „Одете по ѓаволите!“
Ракетниот крстосувач „Москва“ е конструиран во раните 1980-ти во тогашниот СССР.
Тој е изграден во јужниот украински град Миколаев, кој во последните денови редовно беше гранатиран од руските војници.
Бродот долг 186 метри беше водечки брод од класата „Проект 1164 Атлант“ на советската морнарица. Првично беше наречен „Слава“, но подоцна беше преименуван во „Москва“.
Главното вооружување на воениот брод се ракетите П-1000 „Вулкан“.
Крстосувачот, кој стана предводник на Црноморската флота во 2000 година, одигра клучна улога за време на руската воена кампања во Сирија, која започна во 2015 година.