Вистинското инвестирање во реформите и во добрососедските односи значи и сигурен влог во подобра иднина за граѓаните, е еден од заклучоците од средбата
Вицепремиерот за европски прашања Никола Димитров и министерот за надворешни работи Бујар Османи денеска во Брисел имаа средба и со Мирослав Лајчак, специјален претставник на ЕУ за Западен Балкан и за дијалогот Белград – Приштина.
Османи и Димитров, како што се соопштува, посочиле дека Северна Македонија високо ја цени улогата на амбасадорот Лајчак како посредник во разговорите помеѓу Србија и Косово, како и на други прашања во регионот.
Во тој контекст, нагласено е дека како непосредни соседи имаме особен интерес од успехот на дијалогот Белград – Приштина, посредуван од ЕУ. Приближување на ставовите на двете страни и нормализацијата на односите меѓу двете земји ќе претставува огромен влог во стабилизацијата и во европеизацијата на целиот регион, било истакнато од македонска страна.
Соговорниците разговарале и за европската перспектива на Северна Македонија, за добрососедските односи, регионалните иницијативи, како и за очекувањата во периодот што претстои.
Едногласно е заклучено дека Северна Македонија е подготвена да ги почне преговорите со Европската Унија, подвлекувајќи го успехот на земјата како успешна европска приказна во регионот, а со тоа и пример за другите земји од Западен Балкан – јасно прикажувајќи ја трансформативната моќ на европската идеја.
„Од тие причини, европската перспектива на Северна Македонија мора да продолжи без разлика на предизвиците на овој пат. Тоа ќе биде потврда за одржување на политиката на проширување на агендата на ЕУ, но и дека вистинското инвестирање во реформите и во добрососедските односи значат и сигурен влог во подобра иднина за граѓаните“,
гласи заклучокот од состанокот
Како што се соопштува, двоецот Османи – Димитров ја заокружи работната посета на Брисел со работен ручек со претставниците на генералниот директорат во ЕК за соседство и проширување, при што се разменети мислења за постигнувањата и идните реформски планови.