Битолското обвинителство гони двајца браќа од Битола поради детска порнографија. Обинетите се на 51 и 52 години.
Првиот обвинет во 2016 година злоупотребил девојче кое тогаш имало 13 години за изработување видеа со порнографска содржина, информира Основното јавно обвинителство – Битола.
„Преку Фејсбук профил со друго име тој во повеќе наврати комуницирал со девојчето, од ИП-адреси физички лоцирани во Нов Јужен Велс, Австралија, каде обвинетиот престојувал од 30.03.2016 година. Притоа ја убедил оштетената, за која знаел дека е малолетна и нема навршено 14 години, да направи интимни видео клипови со порнографска содржина. Клиповите оштетената му ги испратила на обвинетиот, а во зимата 2017 година тој овие видеа со детска порнографија ги прикажал на друго дете кое не наполнило 14 години, испраќајќи ги од истиот Фејсбук профил во порака“,
соопшти обвинителството.
По спроведена истражна постапка битолското обвинителство поднесе обвинителен акт против двајцата браќа од кои едниот се товари за продолжено кривично дело „прикажување порнографски материјал на дете“ од член 193 став 4 во врска со став 3 и став 1 и во врска со член 45 став 2 од Кривичниот законик, додека двајцата како соизвршители сториле и кривично дело „производство и дистрибуција на детска порнографија“ од член 193-а став 3 во врска со став 2 во врска со член 22 од Кривичниот законик.
„Во периодот меѓу 09.09.2010 година и 30.03.2016 година, во Битола, обвинетите браќа, како соизвршители, преку компјутерски систем набавиле и поседувале над 8.000 слики и видеа со содржина на детска порнографија, сочувани на хард диск и ДВД-а кои биле пронајдени и одземени при претрес на нивната куќа. Фотографии со детска порнографија биле пронајдени и при проверка на нивните мобилни телефони“,
велат од обвинителството.
Еден од обвинетите во текот на истражната постапка подолго време бил недостапен за органите на прогонот, па неговото присуство во текот на постапката било обезбедено со екстрадиција со помош на Интерпол и надлежните органи на Република Грција. Дел од доказите во прилог на обвинителниот акт биле обезбедени преку инструментите на меѓународна правна помош од Австралија.
Надлежниот јавен обвинител до Основниот суд Битола достави и предлог за продолжување на мерката притвор за првиот обвинет, кој се е во притвор откако бил лишен од слобода во Република Грција и екстрадиран во земјава. Како основ за продолжување на притворот се наведува опасност од бегство, можност за влијание врз сведоците, како и можност да го повтори делото кое му се става на товар.