Пациентот не бил вакциниран и немал хронични заболувања, но во исклучително тешка состојба е примен на Клиниката за инфективни болести во Скопје, велат од Министерството за здравство за „360 степени“
Дваесет и двегодишниот пациент, кој во вчерашната статистика на Министерството за здравство и Институтот за јавно здравје беше регистриран како најмладиот пациент што починал од ковид за тоа деноноќие, најверојатно, се заразил на свадбена веселба.
Пациентот не бил вакциниран и немал хронични заболувања, но во исклучително тешка состојба е примен на Клиниката за инфективни болести во Скопје, велат од Министерството за здравство за „360 степени“.
„Пред да побара болничко лекување, четири дена бил со висока температура. Во епидемиолошката анкета стои дека 10 дена пред лекарскиот преглед бил на свадба“,
велат од Министерството за здравство.
Денеска, за жал, како последица на ковид-19 почина уште една млада пациентка на возраст од 15 години.
Како што информира Министерството за здравство, пациентката со многу тешка клиничка слика е донесена на Инфективна клиника, откако 13 дена претходно била со симптоми на болеста.
„Пред да биде болнички лекувана, пациентката имала тегоби 10 дена. Според медицинскиот извештај, станува збор за исклучително тежок случај, со развиена тешка форма на болеста и пациентка е со обезност“,
велат од Министерството за здравство.
Министерството информира дека таткото на девојчето во епидемиолошката анкета навел оти и мајката на девојчето е почината од ковид-19.