Според првичните, неофицијални податоци од првите четири дена од надзорот, е забележано одредено намалување на цените на овошјето и зеленчукот
Засега, како што рече, нема основа за интервенција во однос на цените на прехранбените производи, но дека состојбата континуирано се следи и доколку се оцени дека има потреба, ќе се преземат мерки, вклучително и можност за намалување на ДДВ-то
Државниот пазарен инспекторат (ДПИ) од 10 до 20 мај спроведува контроли во сите синџир-маркети, а доколку се утврди зголемување на маржите ќе бидат преземени соодветни мерки, соопшти денеска министерот за економија и труд Бесар Дурмиши.
На терен, како што информира, се ангажирани 30 тимови, а според првичните, неофицијални податоци од првите четири дена од надзорот, е забележано одредено намалување на цените на овошјето и зеленчукот.
Дурмиши истакна дека засега нема основа за интервенција во однос на цените на прехранбените производи, но дека состојбата континуирано се следи и доколку се оцени дека има потреба, ќе се преземат мерки, вклучително и можност за намалување на ДДВ-то.
Појасни дека ограничување на цените се применува само кога ќе се утврди зголемување на трговските маржи, додавајќи дека минатиот месец имало раст на цените, но и намалување на маржите од страна на трговците.
„Немаме основа по која би постапиле. Ќе ја анализираме ситуацијата до крајот на месецот. Може да го намалиме ДДВ-то за прехранбените производи. Како што реагиравме во делот на горивата, така може да реагираме и во овој сегмент. Нашите контроли се вршат врз маржите што ги ставаат производителите, трговците и дистрибутерите. Ако видиме дека во вакви услови на криза и неизвесност се однесуваат девијантно и ги зголемуваат маржите, ќе реагираме со соодветни мерки, како што реагиравме минатиот пат, со административните мерки што ни се на располагање“,
изјави Дурмиши.
Министерството, како што додаде, континуирано ја следи состојбата и ќе продолжи со мерки за стабилизирање на цените и заштита на стандардот на граѓаните.
Државата, вели тој е увозно зависна, особено во делот на прехранбените производи, што значи дека цените во голема мера зависат од земјите од кои се увезува.
Појасни и дека државата не ги одредува цените на увозните производи, ниту трговците, туку тие се формираат на меѓународните пазари, додека контролите се насочени кон проверка на маржите.
„Ние контролираме дали е зголемена маржата. Имаме можност, во рамките на законот, да постапуваме со соодветни механизми доколку се утврди нејзино зголемување кај производителите, трговците и дистрибутерите“,
истакна Дурмиши, додавајќи дека досега се изречени и казни.
Во однос на инфлацијата, тој рече дека растот не е специфичен само за земјава, туку е присутен и во повеќе европски држави.
„Во Романија инфлацијата е 9 отсто, во Бугарија 6,2, во Хрватска 4,6 отсто. Инфлацијата е зголемена и во други земји. Кај нас е до пет отсто, но се справуваме и реагираме соодветно“,
додаде министерот.
Во таа насока е и објавената мерка за кофинансирање на занаетчиите и малите и средни претпријатија, со цел зголемување на продуктивноста и домашното производство.