Опозициската партија бара итно запирање на градежните работи на парцела во Блаце, тврдејќи дека таму се гради објект за игри на среќа во близина на гробишта
Од компанијата сопственик на „Казино Фламинго“, пак, децидно ги отфрлаат наводите, обвинувајќи ја ДУИ за злоупотреба на корпоративниот бренд за политички препукувања
На прес-конференција, денеска, Имране Велиу од Демократската унија за интеграција (ДУИ), обвинија оти градежните работи што деновиве се одвиваат на парцелата во Блаце ја вознемириле јавноста, бидејќи според нивните официјални податоци земјиштето фигурира како сопственост на компанијата „Flamingo Casino“.
Според партијата, доколку навистина се гради објект за игри на среќа, тоа претставува тежок и провокативен чин.
„Гробиштата не се место за казино. Гробиштата не се зона за коцкање, ниту простор за комерцијален профит. Тоа се места на достоинство и почит кон најблиските. Секој обид во нивна близина да се постави ваква индустрија е навреда кон семејствата и верниците“,
рече таа.
Таа побара итно запирање на сите градежни работи на посочената локација до целосно разјаснување на случајот и јавно објавување на вистинската намена на објектот заедно со целокупната документација и праша како воопшто е дозволена ваква дејност и потсетуваат дека актуелната Влада го повлече законот кој предвидуваше отстранување на казината од чувствителните зони.
На овие обвинувања експресно одговорија од компанијата МАКОТЕН ДООЕЛ, категорично отфрлајќи ги наводите на ДУИ како чиста клевета преку која, како што велат, се манипулира со најдлабоките верски чувства на граѓаните за сурови политички цели. Од компанијата појаснуваат дека МАКОТЕН е фирма со странски капитал од Европската Унија и дека секоја нивна инвестиција е строго усогласена со законите. Тие нагласуваат дека се дел од Групацијата „Новоматик Македонија“ со инвестиции над 80 милиони евра и докажана општествена одговорност.
„Казино Фламинго не црта градежни парцели, ниту се занимава со урбанистичко планирање. Секое тврдење дека имаме цел да нарушиме нечие достоинство или да загрозиме земјиште каде што има гробишта е клевета. Нема со ниту еден нов инвестициски проект да го нарушиме корпоративниот углед“,
велат оттаму.
Компанијата упати апел до политичките фактори веднаш да престанат со обидите за злоупотреба на нивниот светски познат бренд за дневнополитички препукувања, предупредувајќи на неоснована штета врз нивниот углед.