ДУИ ќе остане со актуелните министри и заменици во техничката владата, потврдуваат од партијата за „360 степени“.
ДУИ нема обврска да повлекува и назначува нови министри во владата бидејќи ресорите каде што треба да се случат промени се раководени од кадар на СДСМ.
Ситуацијата за ДУИ беше иста и за предвремените парламентарни избори во 2016 година, кога земјава беше и во политичка криза, но тогаш интегративците решија да ги повлечат сите министри и заменици, по што назначија нови.
Лидерот на ДУИ, Али Ахмети, во интервју за „Косовапрес“, изјави дека на претстојните избори очекува неговата партија да го зголеми бројот на добиени гласови. За останатите партии од албанскиот блок, пак, порача тој, подобро е да се обединат бидејќи не се потребни повеќе од две партии на Албанците за да не се цепкаат гласовите, а со тоа и да се губат пратенички места.
Кога станува збор за техничката влада, таа треба да биде изгласа во Собранието утре, но како пречка во нејзиното формирање досега се јавуваше предлогот на ВМРО-ДПМНЕ за прв човек во МВР да го назначи армискиот полковник Драган Ковачки.
Лидерот на опозицијата, Христијан Мицкоски, денеска изјави дека има нов предлог за кој телефонски ќе се консултира со Зоран Заев и Али Ахмети, по што ќе го соопшти и во јавноста.