Албанците во С. Македонија не се дискриминирани. Може да има одредена неправда во некој судски процес, но тоа не и дискриминација на Албанците.
Ова го изјави лидерот на ДУИ, Али Ахмети, во интервју за „Косовапрес“ во кое зборува и за евроатланските интеграции на земјава, за претстојните избори и за состојбите во албанскиот политички блок.
„Еден народ кој го има своето национално знаме, еден народ кој има три универзитети на својот јазик, два државни и еден приватен, не може да се рече дека е дискирминиран“, вели Ахмети во делот од интервјуто што го пренесува „Радио Слободна Европа“.
Тој повторува дека ДУИ на претстојните парламентарни избори закажани за 12 април е решена да настапи сама и очекува дека ќе го зголеми бројот на гласачи. Сепак, Ахмети смета дека другите партии на Албанците треба да се обединат, бидејќи повеќе од две партии во албанскиот блок во земјава им прават штета на Албанците со расцепкување на гласовите и губење места во Собранието.
Лидерот на ДУИ во интервјуто оценува и дека мандатот на следната влада нема да биде лесен и во него треба да се работи на зголемување на квалитетот на образованието, здравството и судството. За европските интеграции, пак, е оптимист дека работите ќе се променат и С. Македонија ќе пичне преговори со ЕУ.
На прашањето за односите со СДСМ на Зоран Заев, пренесува „Косовапрес“, Ахмети одговара дека нивната соработка продолжува иако има разлики помеѓу нив.