За ДУИ не е прифатлив предлогот на коалицискиот партнер СДСМ – целата јавна администрација да зема минимална плата во наредните два месеца за намалување на економските последици од коронавирусот.
Министерот за економија Крешник Бектеши денеска изјави дека за него и за неговата матична партија ДУИ е прифатливо само намалување на платите на функционерите, но не и на сите административци.
„Јас сум подготвен да земам намалена плата, но не само јас, ние како ДУИ ја поддржуваме мерката што се однесува на минимална плата за сите функционирани или именувани лица, но сме против да се оди на минимална плата за целата јавна администрација. Секако дека имаме наши предлози и би ги охрабрил сите стопански комори, НВО и експерти да достават соодветни предлози, затоа што ние мислиме дека има и други ставки во буџетот каде што може да се скрати првично и да одиме фазно на тоа дека трошокот од оваа пандемија треба да го сносиме сите“,
рече Бектеши.
Според Бектеши, треба да се почне со намалување на платите на функционерите, откажување на секакви плаќања во управни одбори, надзорни одбори и слично, а потоа да се разгледаат и други опции кога ќе се види состојбата на државниот буџет.
Предлог-мерките од СДСМ не се прифатливи ни за ВМРО-ДПМНЕ, од каде што порачаа дека со нив ќе се удри по џебот на најсиромашните.
Како „радикални“ ги оценија и дел од синдикатите, како Синдикатот на работниците од управата, правосудните органи и здруженијата на граѓани (УПОЗ) и Самостојниот синдикат за образование, наука и култура (СОНК), кои вчера преку соопштенија порачаа дека со нив ќе се опфатат работниците кои се најмалку платени.
Според СДСМ, пак, пакетот економски мерки во кој се предлагаат и низа ослободувања за граѓаните и фирмите ќе даде добар резултат за намалување на ударот од коронавирусот врз економијата.
Поврзани вести: