Меѓу причините кои Трајчева претходно ги наведе зошто бара притвор за Рашковски е што има разлика во вредноста на имотот што тој го дал како гаранција пред Апелација за укинување на мерката притвор. Истиот имот, според Трајечва, не бил толкава вредност бидејќи според известување од Општината Струмица тој бил вреден 50 000 евра односно три пати помалку
Поранешниот генерален секретар на Владата Драги Рашковски заврши во куќен притвор. Судечкиот совет реши да му изрече поблага мерка од таа што ја бараше обвинителката Ивана Трајчева – мерка ефективен притвор, откако поранешниот генсек неправосилно беше осуден на осум години затвор. Поранешниот генсек доби и забрана да комуницира со другите обвинети и да користи средства за комуникација независно чија сопственост се.
Притворот следува откако обвинителката Ивана Трајчева побара ваква мерка и за професорот од ФИНКИ Ивица Димитровски, сопственикот на „Инвока груп“, Даниел Станчев и Игор Христов од фирмата ГБТ Сиситеми, кои исто така неправосилно беа осудени на затворски казни. Меѓутоа, за нив судот го одби барањето и ги продолжи поблагите мерките на претпазливост.
Меѓу причините кои Трајчева претходно ги наведе зошто бара притвор за Рашковски е што има разлика во вредноста на имотот што тој го дал како гаранција пред Апелација за укинување на мерката притвор. Истиот имот, според Трајечва, не бил толкава вредност бидејќи според известување од Општината Струмица тој бил вреден 50 000 евра односно три пати помалку.
Втора околност, наведе Трајчева, е што сестрата на Рашковски живее во Словенија и досега му префрлила 35 000 евра поради што обвинителството смета дека таа може да му обезбеди престој во странство.
Понатаму, обвинителката наведе дека е неспорно оти Рашковски поседува голема количина на пари во готовина. Исто така, наведе дека претходно Рашковски кога бил во домашен притвор не ги почитувал мерките за забрана за комуникација и контактирал со Игор Христов, еден од обвинетите.
Одбраната на Рашковски, пак, реагираше дека нема потреба од притвор. Според одбраната, самата казна и определувањето на висината на казната не е нешто што како можност не постоела и досега бидејќи кривичните дела кои му се ставаат на товар веќе му биле познати на обвинетиот.
Тоа дека Обвинителството обвинува дека се кршеле мерките, според одбраната, можело и досега да биде причина за барање притвор. За проценката на имотот, пак, се реагираше дека тоа единствено може да го направи овлатен проценител. Тоа дека неговата сестра е во странство, според одбраната, е веќе позната флоскула што ја користи обвинителството.
Рашковски, пак, им рече на судиите да имаат предвид дека води постапка во Стразбур за притворите што му беа определени претходно, а на судијката Фанка Јанчулева-Михаиловска и обвинителката Ивана Трајчева им се закани дека со јавноста ќе сподели материјали како се договараат во врска со предметот.
Кога Трајчева бараше притвор за Даниел Станчев рече дека стравот од бегство за него постои со оглед дека нема имот и нема оформено семејство, како и дека најголем дел од парите од неговата фирма „Инвока Груп“ ги вадел во готовина.
Станчев, пак, потсети дека и тој води постапка во Стразбур за притворот и како што веќе информиравме, рече дека нема да бега зошто неговата сакана е во земјава и се сврте кон обвинетата Ирена Ивановска и ја запроси.
Во врска со Ивица Димитровски и Игор Христов, пак, обвинителката посочи на опасноста од бегство, меѓу другото и затоа што во минатото ваделе пари во готовина.