Ќе видиме што ќе се случи во следниве денови. Ние ќе продолжиме да бидеме посветени, нема да дигаме раце, целосно сме посветени на Договорот, ќе продолжиме да работиме, ова не е последен КОРЕПЕР, порача вицепремиерот за европски прашања Никола Димитров во неговото вечерашно гостување во емисијата „Само интервју“ на Канал 5 ТВ, откако денеска беше објавено дека Бугарија ја стави првата блокада за Северна Македонија на амбасадорскиот состанок во Брисел.
Сепак, порача Димитров, за македонскиот јазик и идентитет не можеме да разговараме.
Во зависност од тоа дали ќе се отворат или не преговорите, според него, тоа ќе биде или заеднички успех или заеднички неуспех за и за Брисел, и за Софија и за Скопје.
„Каква пораката се испраќа за целиот Балкан ако во март има одлука за преговори, а до декември ништо не се случи. Довербата во зборот на ЕУ ќе се истенчи уште повеќе. Тоа не е добра порака до нашите соседи. Ако се видат сите извештаи на ЕК, факт е дека ние со сите наши мани, во очите на ЕУ има надеж дека нашево ќе успее, дека ние ќе се реформираме и ќе станеме европска држава. Така нè гледаат во многу земји членки“,
рече Димитров.
Тој потсети дека и во Лисабонскиот договор на кој е основата ЕУ, се наведува дека Унијата е должна да ги почитува културното и јазичното богатство и оти ќе ги третира своите соседи врз основа на овие европски вредности.
Во однос на јазикот, порача вицепремиерот, тој е македонски јазик за нас, за Обединетите нации и за ЕУ. Бугарија, пак, ако сака, има право да си ја задржи својата резерва, но според Димитров, тоа не е добро за идните односи.
„Резервата на Софија кон јазикот е инвестиција во лоши односи. Ако Софија не сака да ја тргне таа резерва, може да ја задржи како бугарска позиција, но тоа не е добро, и не е прашање на политиката и државата, туку на науката. Нашиот јазик е македонски за нас, за ОН и за ЕУ. Тоа е наведено и во нацрт декларацијата на ЕК, а така треба да биде и во Рамката за преговори“,
рече Димитров.
Нека се замислат сите, рече Димитров алудирајќи на Бугарија, како би се чувствувале кога нивна соседна земја ќе ги оспоруваа овие прашања.
„Ако ние сме чепкани каде ни е најсвето, ќе биде многу тешко да развиваме вистинско пријателство. Нашето право на самоопределување е многу базично. Ние бараме елементарна почит, да ни го почитуваат достоинството“,
рече вицепремиерот.
За историските прашања, рече Димитров, не може државата да има став, тоа е научно прашање и токму тоа била и идејата на Договорот за добрососедство – историјата да ја разгледуваат историчарите, а политичарите да градат пријателство.
Според него, македонско-бугарската комисија дала брзи резултати ако се спореди нејзината работа со слични комисии: германско-француската, германско-полската, германско-чешката …
Димитров најави дека предложиле и официјално да се објават резултатите од оваа комисија.