За враќање во земјава во МНР се пријавиле 5.228 граѓани од целиот свет, од кои 2.890 се согласиле да бидат сместени во државен карантин.
Вкупно 2.207 македонски државјани до денеска се вратени во земјава, информираат од Министерството за надворешни работи кое го организира враќањето на оние кои се затекнаа во странство по прогласувањето на пандемијата на ковид-19.
Како што објави МНР, од 22 март до 4 април на глобалниот контакт центар за конзуларни услугу во итни ситуации се пријавиле 5.228 македонски граѓани од целиот свет кои сакаат со авион да се вратат во земјавата. Од нив 2.890 се согласиле да бидат сместени во државен карантин. Најголем дел од повиците – 93 проценти или 4.861 доаѓаат од Европа, а 272 повика се регистрирани надвор од други континенти.
Со досега реализираните чартер– летови од Ла Валета, Загреб, Љубљана, Виена, Базел, Минхен, како и по два лета од Берлин и од Келн/Бон, во земјата се вратиле 1.445 наши државјани. Преку три хуманитарни конвои со автобуси и автомобили од Црна Гора, Турција и Словенија обезбедено е враќање на 150 наши државјани. Со посредство на Австрија и Португалија во земјава се вратени и 11 македонски државјани од Перу.
МНР, во соработка со странски претствништва кај нас, репатрираше и над 600 странски државјани меѓу кои и на Австрија, Австралија, САД, Франција, Хрватска, Црна Гора и Косово.
По избувнувањето на пандемијата со коронавирусот сите гранични премини на земјава беа затворени на 16 март, а на 18 март беше затворен и Меѓународниот аеродром кај Скопје. По враќањето во земјава сите патници се упатуваат во државен карантин.