ладата со Уредба со законска сила ја ограничи исплатата на додатоците и надоместоците на плата за вработените во јавниот сектор во време на вонредната состојба.
Уредбата е донесена на денешната владина седница и таа значи дека на поголемиот дел од вработените нема да им се исплаќаат додатоците.
„На вработените опфатени со оваа уредба со законска сила не им се исплатуваат додатоци и надоместоци на плата согласно закон и колективен договор, за време на траење на вонредната состојба“, соопштија од Владата.
Додатоци и надоместоци додека трае вонредната состојба нема да добијат вработените во сите органи на државната власт и на локалната самоуправа, како и вработените во училиштата, институциите од областа на културата и спортот, во јавните претпријатија, агенциите, фондовите, регулаторните тела…
Исклучок се медицинскиот и техничкиот персонал во здравствените установи и припадниците на МВР и на Армијата.
Донесена е уште една Уредба за јавниот сектор и таа се однесува на тоа дека вработените кои не го искористиле годишниот одмор од 2019 да го искористат најдоцна до 31 мај 2020. На оние кои веќе се ослободени од работат, ланскиот преостанат одмор ќе им се смета за искористен.
Вработените во здравството, како и припадниците на МВР и Армијата, неискористениот одмор, пак, од 2019 ќе можат да го искористат до 31 декември 2020. До тогаш ќе можат да го искористат и првиот дел од новиот одмор за 2020.