Сите лица, без оглед на нивниот работен статус, доколку се дијагностицирани од ковид-19, нивниот третман паѓа на товар на ФЗОМ, истакна директорот на Фондот, Ден Дончев, утрово во емисијата „Утрински брифинг“ на „Слободна ТВ“, одговарајќи на прашањето за тоа како ќе се покрива лекувањето на невработените, сега отпуштените и за оние што работат во неформалната сива економија.
Тој потенцира дека ова прашање Фондот за здравствено осигурување го има предвидено и е предложено решение до Владата.
Во однос на лековите што се користат за третман за коронавирусот, Дончев рече дека Министерството за здравство, за да ги заштити пациентите, дозволило потпишување и издавање на товар на Фондот додека траат мерките.
„Конкретно за леквите азитромицин и хидроксихлорокин, треба да сме свесни дека сè уште течат клинички студии за ова прашање. Точно е дека во одредени ситуации покажале успех во третманот. Токму поради тоа Министерството за здравство, за да ги заштити пациентите, дозволи потпишување и издавање на товар на Фондот додека траат овие мерки“,
рече Дончев додавајќи дека треба да се алармира дека оваа терапија мора да се применува исклучиво во болнички услови под надзор на лекари специјалисти.