„Не случајно се избираат училиштата, средните училишта воглавно. Затоа што таму децата патуваат самостојно, родителите вообичаено не знаат каков е процесот додека децата се таму и ова е токму онака како по книга како се прави хибридна закана“, изјави деканот на Факултетот за безбедност Никола Дујовски
Лажните дојави за поставени бомби во училиштата се токму „како по книга“ како се прави хибридна закана, смета деканот на Факултетот за безбедност Никола Дујовски, кој вели дека не случајно се избираат училиштата како цел на дојавите за бомби.
Говорејќи во утринската програма на Македонската радио-телевизија, Дујовски посочи дека е повеќе од очигледна намерата на лицата кои ги испраќаат заканувачките пораки да предизвикуваат страв и паника кај населението.
„Веројатно не е можно да се случи некаква поголема штета освен напишаната порака, но ние секако мора да бидеме претпазливи затоа што едноставно светот, а особено овој регион е многу чуствителен на таквите хибридни закани и на се друго што може да предизвика вознемиреност. Не случајно се избираат училиштата, средните училишта воглавно. Затоа што таму децата патуваат самостојно, родителите вообичаено не знаат каков е процесот додека децата се таму и ова е токму онака како по книга како се прави хибридна закана“,
вели Дујовски.
Трендот на дојави за бомби кој пред неколку месеци започна прво во Србија, вели Дујовски, сега е и кај нас како дел од закани коишто засега остануваат само во фаза на погрешно испратени пораки, меѓутоа, како што рече, полицијата има обврски и добро е што се постапува на тој начин.
„Децата и наставниците и сите присутни во училиштата мора веднаш да бидат евакуирани и однесени на безбедно и полицијата да ја провери секоја дојава за поставена бомба или каква било закана. Тоа се прави и ќе се прави во наредниот период. Министерството за внатрешни ги гради капацитетите да може да одговори на ваквите закани, да ги пресретне ваквите пораки, да ги анализира и да ги спречи едноставно“,
изјави професорот Дујовски.
Според него, добро е што разменуваме информации во мрежата на НАТО бидејќи овие прашања не се само за Македонија, ниту пак сме ние единствена земја изложена на вакви притисоци и добро е да ги градиме нашите капацитети и натаму.
„Се надевам дека овој тренд ќе се смири и се надевам дека институциите ќе се посветат на ниво на задачата, впрочем како и досега“,
рече деканот на Факултетот за безбедност.
Вчера и премиерот Димитар Ковачевски нагласи дека лажните дојави за бомби кои вчера по шести пат стигнаа до скопските училишта, се дел од стратегија за хибридни напади, на која се изложени и земјите од регионот и пошироко.
Министерот за внатрешни работи Оливер Спасовски вчера изјави дека најголем дел од заканите за поставени бомби во средните училишта се лоцирани од каде доаѓаат и оти Министерството работи на заштита.
Вчера девет скопски училишта добија закани за поставени бомби во своите објекти, но по извршените антитерористички проверки од страна на единиците на МВР се отврди оти се лажни.