Нема да постигнеме договор ако дел од пакетот не е и одлука за одржување на прва меѓувладина конференција со ЕУ, рече министерот за надворешни работи во гостување на Канал 5, посочувајќи дека пред да се испрати одговорот до Софија треба да се состане историската комисија
Постои простор за решение за сите шест точки од билатералниот протокол меѓу С Македонија и Бугарија, произлезени од самиот во Брдо, и навистина би било жално ако ја пропуштиме оваа шанса, изјави министерот за надворешни работи, Бујар Османи, во вечерашното интервју за телевизија „Канал 5“.
Тој информира дека во моментов Владата работи на одговор на предлогот-решенијата на Софија во однос на петте прашања, но претходно треба да се состане историската комисија. Османи не кажа конкретно дали кон крајот на месецов и почетокот на ноември ќе се потпише протоколот со Бугарија.
„Доколку се постигне договор за тие пет точки. Треба да има уште една точка, а тоа е да има поддршка од Бугарија за одржување на првата меѓувладина конференција на одреден датум. Мора да има „пет плус две точки“ за да има договор. Ако се случи тоа, тогаш на меѓувладината комисија, треба да го усвоиме тој договор, кој ќе биде потврден од двете влади. И паралелно се разговара за позиција на тој патоказ во европскиот процес. И ние сметаме дека португалскиот предлог е решението“,
вели Османи.
Постигнување на договор со Бугарија, вклучува во себе и почеток на преговори на нашата држава со ЕУ, изјави министерот за надворешни работи.
„Нема да постигнеме договор, ако дел од пакетот не е и одлука за одржување на прва меѓувладина конференција“,
рече Османи.
Тој информира дека пред да се испрати одговорот на Бугарија за петте прашања, треба да се состане историската комисија, за која Османи изрази незадоволство од нејзината работа и од пристапот наметнување на една историска вистина.
„Се надевам дека средбата на историската комисија ќе се одржи со физичко присуство, а не онлајн. Затоа што сметам дека со директните и отворени разговори ќе може да се дојде проактивно до тие решенија. Ова е толку важен момент и сметам дека треба сите да бидеме на ниво на задачата и да се обидеме да стигнеме до решенија“,
нагласи Османи.
Министерот за надворешни работи нагласи дека на самитите на ЕУ, 26 земји-членки кажуваат дека се за почеток на преговори со Унијата, а единствена која вели „не“ на последните самити е Бугарија.
Османи потенцира дека целата енергија на Владата е насочена да се постигне договор со Бугарија и на декемврискиот самит да се одлучи Република Северна Македонија да почне преговори со Унијата. Ако не успееме до декември, продолжуваме понатаму. Ова е маратон и ние немаме друга лента за трчање, Како што станавме членка на НАТО, така ќе станеме и членка на ЕУ, истакна Османи.