„Кој губи има право да се лути“, порача претседателот на СНСД и кандидат за претседател на Република Српска, Милорад Додик, коментирајќи ги вчерашните протести на опозицијата која обвинува за изборни кражби на претседателските избори
Претседателот на СНСД и кандидат за претседател на Република Српска, Милорад Додик, синоќешните протести на опозициските партии кои обвинија за изборни кражби на изборите во БиХ ги коментираше со зборовите „кој губи има право да се лути“, јавува босанскиот портал „Кликс“.
Тој додава дека сè се одвивало мирно на изборите, а коментирајќи ги протестите на опозицијата поради наводни кражби на изборите, рече дека е убеден оти тоа е создавање атмосфера која воопшто не постои.
„Требаше да почекаме и потоа да кажеме дали има или не изборни кражби. Целосно сум убеден дека ова е создавање на атмосфера која воопшто не постои“,
изјави Додик за телевизијата К3, а пренесува порталот „Кликс“.
На вчерашниот протест на опозицијата во Република Српска, лидерите на опозициските партии уште еднаш обвинија дека претседателските избори се украдени, додавајќи оти нема да дозволат тоа да помине.
Улиците во центарот на Бања Лука беа блокирани поради протестот на кој повеќе илјади симпатизери и членови на опозицијата побараа повторно пребројување на гласовите во овој ентитет на Босна и Херцеговина. Протестите поминаа мирно и без инциденти.
„Не сум ограбена јас, ограбен е народот на Република Српска. Тоа нема да им го потврдам, никогаш нема да потврдам кражба, особено на волјата на народот. Ние овде го браниме уставниот поредок на Република Српска“,
порача Јелена Тривиќ, кандидатка на опозицијата за претседател на Република Српска.
Тривиќ ноќта по затворањето на избирачките места на 2 октомври прогласи победа, но тоа истовремено го направи и лидерот на СНСД и кандидат на владејачката коалиција Милорад Додик.
Тривиќ и опозициските партии што ја поддржуваат, тврдат дека гласовите се украдени токму во текот на изборната ноќ во градовите Приједор, Зворник и Добој.