Дел од опозициските пратеници ги препознаваат деструкциите во законодавниот дом, вели Јован Митревски – 20 дена откако парламентот ѝ изгласа доверба на Владата, кога и последен пат сите владејачки пратеници беа во салата
Очекувам дека ќе се зголеми парламентарното мнозинство. Дел од опозициските пратеници ги препознаваат овие деструкции, изјави координаторот на пратеничката група на СДСМ, Јован Митрески, во емисија на ТВ 24, откако спикерот Талат Џафери прогласи мораториум за одржување пленарни седници додека владејачките партии не обезбедат присуство на најмалку 61 пратеник, за да може да се одлучува.
Митрески нагласи дека парламентот е закочен од опозицијата и дека Законот за државјанство, поднесен од Алијансата на Албанците и Алтернатива, е блокиран со амандмани на ВМРО-ДПМНЕ и на Левица.
„Нема ниту еден амандман од мнозинството на овој предлог-закон, но ние ги кажавме нашите забелешки и, според меѓународните конвенции и според експертите, не знам дали можеме со ваков закон да го решиме статусот на некои граѓани. Наш став е дека со ваква содржина не може да се донесе закон. Нашиот став е дека нема да го гласаме“,
рече Митрески и нагласи дека СДСМ сака решение за овие луѓе, но не на ваков начин.
Тој вели дека не гледа причина Собранието да биде блокирано затоа што, условно кажано, македонската опозиција блокира закон на албанската опозиција.
„Според мене, има два логични заклучока: или се договорени да биде блокирано Собранието или албанската опозиција наседнала на провокација на ВМРО-ДПМНЕ и на Левица и влегле во блокада за да не бидат единствени блокатори на Собранието“,
оцени Митрески.
На 3 март парламентот со 62 гласа, колку што брои мнозинството, ѝ изгласа доверба на Владата на СДСМ и на ДУИ, по барање на премиерот Зоран Заев. Оттогаш поминаа 20 дена, во кои во собраниската сала не може да се обезбеди присуство на сите владејачки пратеници за пленумот да може да носи одлуки. Додека двајца пратеници од мнозинството се заразени со коронавирус, од кои едниот е хоспитализиран, опозицијата одбива да учествува во обезбедувањето кворум, а на последната координација во понеделникот му поставила услов на Џафери, што тој не го прифати и ја одложи на неодредено седницата што требаше да почне вчера.