Кој ќе го наследи Милевски, официјален предлог очекува и премиерот Димитар Ковачевски за да може да го достави и до Собранието
До крајот на неделата се очекува Либерално демократската партија (ЛДП) и официјално да одлучи кој ќе биде предложен за нов министер за локална самоуправа на местото на актуелниот Горан Милевски, кој си поднесе оставка од функцијата.
Потпретседателката на партијата, Моника Зајкова, во изјава за „360 степени“ вели дека прво сакаат внатрепартиски да дискутираат и да одлучат, а потоа и официјално да го објават името.
„Првично партијата треба да заседава во рамки на Извршниот одбор кој предлага до Централниот одбор на партијата за да се донесе официјална одлука“,
вели Зајкова најавувајќи дека очекува до крајот на неделава да падне одлука.
Во јавноста веќе е познато дека најсериозен кандидат за нов министер за локална самоуправа е поранешниот градоначалник на Скопје, Ристо Пенов. Тоа веќе му е понудено, а од партијата очекуваат во меѓувреме да добијат и одговор од него.
Кој ќе го наследи Милевски, официјален предлог очекува и премиерот Димитар Ковачевски за да може да го достави и до Собранието.
„Министерството за локална самоуправа во распределбата на ресорите и одговорностите е во одговорност на Либерално демократската партија и штом ЛДП ќе предложи личност која ќе го замени постојниот министер кој поднесе оставка, тогаш тоа ќе биде доставено до парламентот“,
изјави денеска Ковачевски.
За Милевски, покрај за повлекувањето од министерската функција, во јавноста веќе се објавија информации дека веројатно ќе замине и од лидерската позиција во ЛДП за кое место како најсериозен кандидат се споменува Зајкова, која е и една од двајцата пратеници од оваа партија во Собранието.