Мерката со која ДДВ за дизел-горивото беше намалено од 18 на 10 проценти почна да се применува на 15 септември, како мерка за ублажување на ценовниот притисок врз граѓаните и таа истекува денеска
До 12 октомври се продолжува мерката со која ДДВ за дизелот се намалува од 18 на 10 проценти, објави денеска министерката за финансии Гордана Димитриеска-Кочоска.
Со мерките, како што посочува Димитриеска-Кочоска, Владата продолжува со заштита на стандардот на граѓаните и стабилноста на домашната економија.
„Со продолжувањето на оваа мерка директно влијаеме врз малопродажните цени на горивата и го ограничуваме пренесувањето на надворешните ценовни притисоци врз цените на останатите производи и услуги. Реагираме навремено и одговорно, следејќи ги движењата на меѓународните пазари и преземајќи мерки кога тоа е потребно за да го заштитиме стандардот на граѓаните“,
објави Димитриеска-Кочоска на својот фејсбук-профил.
Мерката со која ДДВ за дизел-горивото беше намалено од 18 на 10 проценти почна да се применува на 15 септември, како мерка за ублажување на ценовниот притисок врз граѓаните и таа истекува денеска.
Регулаторната комисија за енергетика денеска треба да ги утврди максималните цени на горивата што ќе важат во следните седум дена.
Со последната одлука на Регулаторната комисија за енергетика, цената на дизелот се зголеми на 104,5 денари за литар. Цената на еуросупер БС-95 е 99 денари, а еуросупер БС-98 се продава по цена од 101 денар за литар.
Минатата недела, министерката за енергетика, рударство и минерални суровини, Сања Божиновска, рече дека ако ескалира ситуацијата со цената на горивата, Владата ќе ги преземе сите мерки за да го ублажи ризикот кон граѓаните, додавајќи дека ситуацијата внимателно се следи.
Божиновска нагласи дека покачувањето на цените е резултат на глобални фактори и воени конфликти врз кои државата нема влијание. Божиновска рече и оти во овој момент не се водат нови преговори за дополнителен попуст со „Окта“, но таа можност останува отворена доколку кризата се продлабочи.