Каде е јавниот интерес на државата кога може да се докупи 70 проценти од парцела која е во државна сопственост, ако имате сопственост на само 30 проценти од земјиштето. Треба да биде обратно, вели членката на ДКСК, Катица Николовска
Последниот пример со приватизација на државно земјиште во строгиот центар на Скопје за багателна цена ги алармираше членовите на Државната комисија за спречување на корупција (ДКСК). Во денешното издание на 360° претседателката на ДКСК, Билјана Ивановска, и членката на ДКСК, Катица Николовска, се осврнаа на случајот на продажба на 663 метри квадратни кај поранешна „Нова Македонија“ за само 7 евра за квадрат на фирмата на „ЗСФ-КОМ“ на бизнисменот, Фатмир Етеми.
Тие потврдија дека во рамките на предметот што е отворен е побарана документација од Општина Центар, како и од Министерството за финансии. Според Ивановска и Николовска, не е доволно тоа што Владата, во меѓувреме, реши да ја промени уредбата со која се зголеми цената по која се приватизира државното земјиште.
„Самиот моделот е проблематичен, не е само цената, туку пристапот – со само 30 отсто сопственост да може да докупите 70 проценти државно земјиште. Јас сум убедена дека во нашата постапка ќе утврдиме дека продажбата била законска, дека се е според Устав и закон. Каде е јавниот интерес на државата кога може да се докупи 70 проценти од парцела која е во државна сопственост, ако имате сопственост на само 30 проценти од земјиштето. Треба да биде обратно“,
вели Николовска.
Претседателката на ДКСК, Ивановска, вели дека дополнително се користат и други механизми од законите, како легализација, за потоа со приватизација да се дооформуваат градежни парцели.
„Да не не чуди дека истото ќе се случи и во Маџир маало, каде се купуваат мали објекти, па тие се легализираат, па ќе се откупи земјиштето, па потоа ќе се доокрупни и оп, ете ќе се крене некоја гигант-зграда. Секако, треба да се види од каде протекуваат информации, кој дава информации дека на тоа земјиште може нешто да се планира. Оттука, прашувам која е целта на државата – дали багателно да го распродаде целиот државен имот или да го заштити јавниот интерес. Не може да се гради јавен интерес на приватна парцела“,
вели Ивановска.