Освен што Антикорупциската комисија најави дека будно ја следи институционалната распределба на идните судии јавни обвинители, претседателката на ДКСК, Билјана Ивановска, порача оти е потребно Судскиот совет и Советот на јавни обвинители да ги зајакнат своите контроли кои опфаќаат и квалитативно и квантитативно оценување, а што би било основа за понатамошно оценување на работата на овие кадри
Државната комисија за спречување корупција (ДКСК) нема механизам со кој ќе може да испита како блиски роднини на функционери, судии и обвинители ја завршиле Академијата за судии и јавни обвинители, но може да внимава во однос на нивната распределба во институциите, изјави првата антикорупционерка Билјана Ивановска.
„Од наш аспект, како Антикорупциска комисија останува како превентива да се внимава на распределбата на овие обвинители и судии, во кои судови и обвинителства ќе се распределат, да не бидат во близина на свои блиски лица, со цел колку-толку да се намали влијанието“,
нагласи Ивановска и додаде дека само оддалечувањето на политиката од професионалноста може да ја спаси оваа држава.
Освен што ДКСК најави дека будно да ја следи институционалната распределба на идните судии јавни обвинители, Ивановска порача оти е потребно Судскиот совет и Советот на јавни обвинители да ги зајакнат своите контроли кои опфаќаат и квалитативно и квантитативно оценување, а што би било основа за понатамошно оценување на работата на овие кадри.
Во услови на големо политичко влијание и висок ризик од корупција, нагласи Ивановска, сомнежите и чувствителноста кај граѓаните се многу високи, а токму затоа, работата на идните судии и јавни обвинители ќе биде под лупа на јавноста. Контролниот систем во државата не е доволно отпорен на корупција, смета таа и додава оти е нормално да има бурни реакции во јавноста околу изборот на идните судии и јавни обвинители.
Во однос на прашањето за проверка на имотната состојба, Ивановска вели дека тоа се прави континуирано согласно законот и дека секоја година се носи план за проверка на имотната состојба, врз база на проценка на ризик и врз база на определени критериуми.
„Речиси секоја година има дел од судиите коишто се дел од планот што го работиме. Една година беа само судии, и тоа претседатели на судови за коишто утврдивме определени неправилности, меѓутоа за три од нив утврдивме и несразмерно зголемување на имотот и тие предмети се предадени во надлежни институции. По мене, клучната борба против корупција е донесување на законот за потекло на имот, со којшто ќе бидат опфатени сите граѓани бидејќи носителите на јавни функции не го прават тоа сами, туку во спрега со некои други свои блиски лица коишто не мора да се на јавна функција и факт е дека не можеме да кажеме дека она што го прикажуваат во анкетните листови е секогаш реално“,
рече претседателката на ДКСК.
Со низа реакции во јавноста деновиве беше примена информацијата дека меѓу 58 кандидати кои го положиле завршниот испит на Академијата за судии и јавни обвинители, се и блиски роднини на јавни функционери, судии и обвинители.
Меѓу оние што најмногу „паѓаат во очи“ е името Барлет Џафери, синот на претседателот на Собранието, Талат Џафери, кој ќе биде иден јавен обвинител. Неговото име ја брануваше јавноста кон крајот на 2022 година, кога ДКСК објави дека се здобил со право да полага правосуден испит во 2015 година, иако сè уште дипломирал.
Меѓу идните судии и јавни обвинители се и сопругата на шефот на ОЈО ГОКК, роднина на генералната секретарка на законодавниот дом, сопругата на потпретседателот на ВМРО-ДПМНЕ и градоначалник на Аеродром, како и деца на актуелни или поранешни судии или јавни обвинители.