Претседателката на Антикорупциска, вчера на прес-конференција во детали наведуваше какви сè иницијативи презеле во врска со Мерко, и обвини дека институциите не реагирале. По ова, со реакција се јавија од Владата, поточно од кабинетот на вицепремиерката за политики за добро владеење Славица Грковска, од каде што посочија дека обвинувањата од страна на ДКСК во врска со непостапувањето за случајот со струшкиот градоначалник Рамиз Мерко се неосновани и паушални
Изненадени сме од реакцијата на Кабинетот на вицепремиерката Грковска, за паушални и неосновани обвинувања, дотолку повеќе што во однос на предметот за градоначалникот на Струга, Рамиз Мерко, не беше воопшто спомнат. Истовремено, изненадени сме од неоснованите критики за работата на Државната комисија за спречување на корупцијата (ДКСК), од орган чија цел е борбата против корупцијата, реагираат од ДКСК по критиките на Владата дека ДКСК, предводена од претседателката Билјана Ивановска, во обид да ги оправда постапувањата или непостапувањата на ДКСК, се обидува надлежноста и одговорноста да ја префрли на други институции, без притоа да има предвид дали се тие надлежни или не за конкретни случаи.
„Сите предмети на ДКСК се уредно и согласно законите елаборирани и доставени до надлежните институции. Непостапувањето на другите институции не е одговорност на ДКСК затоа што согласно нашите законски надлежности и ингеренции немаме механизми за да влијаеме на нивната работа и динамика на постапување. Неопходно е во интерес на граѓаните и во интерес на напредокот на решавање на случаите на корупција заеднички сите надлежни тела да ги насочат своите капацитети со иста цел, наместо неосновано да се напаѓа работата на ДКСК“,
велат од Антикорупциската комисија.
Доброто владеење, додаваат оттаму, подразбира соработка и поттикнување на институциите да работат одговорно, отчетно и транспарентно со воспоставени силни контролни системи и механизми.
„Сите иницијативи и препораки на ДКСК се упатени во таа насока“,
се вели во соопштението на ДКСК.
Претседателката на Антикорупциска, вчера на прес-конференција во детали наведуваше какви сè иницијативи презеле во врска со Мерко, и обвини дека институциите не реагирале.
„Немаше да има потреба од толкава бура, која во јавноста ја предизвика одлуката на американскиот Стејт департмент да го стави на ‘црна листа’ струшкиот градоначалник Рамиз Мерко доколку Јавното обвинителството, Судскиот совет, Министерството за внатрешни работи и другите надлежни институции си ја вршеле работата и постапувале по иницијативите на Државната комисија за спречување на корупција“,
истакна Ивановска.
Колку иницијативи до Владата сме дале, па не презедоа ништо за разрешување или одговорност, рече таа во дел од прес-конференцијата зборувајќи генерално за активностите на Антикорупциска.
По ова, со реакција се јавија од Владата, поточно од кабинетот на вицепремиерката за политики за добро владеење Славица Грковска од каде што посочија дека обвинувањата од страна на ДКСК во врска со непостапувањето за случајот со струшкиот градоначалник Рамиз Мерко се неосновани и паушални.
За жал, реагираа од Владата, ДКСК предводена од претседателката Ивановска, во обид да ги оправда постапувањата или непостапувањата на ДКСК, се обидува надлежноста и одговорноста да ја префрли на други институции, без притоа да има предвид дали се тие надлежни или не за конкретни случаи.
Мерко е дел од локалната власт, и од Владата нагласија дека тие не се надлежни за тоа.
„Им предочуваме на членовите на ДКСК дека заменичката на претседателот на Владата, Славица Грковска, во согласност со овластувањето што го има од претседателот на Владата е задолжена за спроведување на Кодексот за етичко однесување на членовите на Владата и други функционери избрани од Владата. Имајќи ја предвид поделбата на власта на локално и на централно ниво, вицепремиерката Грковска нема и не може да има надлежност врз функционер кој е избран на непосредни избори. Од тие причини, вицепремиерката Грковска во оваа насока може да даде само препораки во однос на почитување на принципите за добро владеење и ништо повеќе“,
пишува во демантот од кабинетот на Грковска.