Според него, во струшкиот затвор на 28 ноември стигнала наредба од Основниот кривичен суд Скопје, Мијалков да биде спроведен од затворот во судот на рочиште закажано на 12 декември. Од затворот, како што наведува Ќура, постапиле по наредбата и го спровеле Мијалков, но го вратиле назад бидејќи рочиштето се одложило. Потоа на 14 декември до КПД Струга стигнала нова наредба за спроведување на Мијалков за рочиште за истиот предмет, но повторно со истиот датум – 12.12.2022 кога Мијалков треба да биде спроведен во Основниот кривичен суд Скопје
Техничка грешка на Основниот кривичен суд Скопје, односно погрешни датуми наведни во наредбата за спровод до Казнено-поправниот дом во Струга, е наводно причината за отсуството на ексдиректорот на УБК, Сашо Мијалков, на денешното рочиште од продолжението на судскиот процес за случајот „Титаник 2“, поради што тоа беше одложено.
Ова во изјава за „360 степени“ го тврди директорот на КПД Струга, Ваљон Ќура.
Според него, во струшкиот затвор на 28 ноември стигнала наредба од Основниот кривичен суд Скопје, Мијалков да биде спроведен од затворот во судот на рочиште закажано на 12 декември. Од затворот, како што наведува Ќура, постапиле по наредбата и го спровеле Мијалков, но го вратиле назад бидејќи рочиштето се одложило.
Потоа на 14 декември до КПД Струга стигнала нова наредба за спроведување на Мијалков за рочиште за истиот предмет, но повторно со истиот датум – 12.12.2022, кога Мијалков треба да биде спроведен во Основниот кривичен суд Скопје.
„Станува збор за техничка грешка од страна на Кривичниот суд. Во нашата институција прво примивме наредба за спроведување на осудениот С.М. на 28.11. 2022, за одредено судско рочиште на 12.12.2022 година. По оваа наредба ние имаме постапено и сме го испратиле осудениот С.М. на конкретното рочиште. Ова судско рочиште е одложено и потоа на 14.12.2022 година во нашата институција повторно пристигна барање од Кривичниот суд за истото лице, но и ова барање беше со ист датум како и за претходното рочиште, односно 12.12.2022 година. Значи, евидентно е дека станува збор за техничка грешка. Затоа во прилог ви ги испраќам и двете писма што ние како институција сме ги примиле. Настојуваме на транспарентност и соработка со сите институции, јавноста и секако со медиумите“,
вели директорот на КПД Струга, Ваљон Ќура, во порака испратена преку Вибер.
Инаку, од двете наредби што ни ги достави директорот на затворот може да се види дека првата судот ја испратил на 23 ноември, а во КПД Струга со печат е заверена како примена на 28 ноември, датум на кој според Ќура била и примена. Датумот кога Мијалков треба да биде спроведен во Скопје на рочиште во Кривичниот суд е 12.12.2022 година.
Втората наредба што ни ја испрати Ќура, всушност, е истиот документ, единствено разлика е во печатот со кој е заверена како примена од затворот е наведен датумот 14.12.2022 година.
Денешното рочиште од продолжението на судскиот процес за случајот „Титаник 2“ во кој меѓу обвинетите се ексдиректорот на поранешната УБК, Сашо Мијалков, и лидерот на ДПА, Мендух Тачи, се одложи бидејќи во Основниот кривичен суд во Скопје не пристигна комбето за спровод на струшкиот затвор со кое требаше да биде донесен Мијалков.
За ова алармираа и од Коалицијата „Сите за правично судење“.
„На 22.12.2022 година беше закажано рочиште по предметот: „Титаник 2″, кое беше одложено поради отсуство на обвинет бидејќи не е спроведен од затворот во Струга“,
напишаа од невладината организација на Фејсбук.
За потсетување, Мијалков е на издржување на тригодишната затворска казна во струшкиот затвор откако се спогоди со Обвинителството за гонење на организиран криминал и корупција во случајот „Империја“.
Од Коалицијата „Сите за правично судење“ велат дека судиите што го водат процесот се јавиле во затворот во Струга, од каде што им било одговорено дека не добиле наредба за спровод на Мијалков.
„Судиите што го водат процесот се јавија во затворот во Струга, од каде им одговорија дека не добиле наредба за спровод на обвинетиот Сашо Мијалков. Но, судиите имаат повратница дека наредбата била примена уште пред осум дена, на 14.12.2022 година“,
велат од Коалиција „Сите за правично судење“, кои го следат судскиот процес и чиј претставник бил присутен денеска во судот.
За денешниот случај со неспроведувањето на Мијалков се огласи и Управата за извршување санкции при Министерството за правда, од каде што велат дека Управата ќе ги преземе сите активности и најави вонреден инспекциски надзор на КПД Струга за расчистување на случајот.
„Во врска со постапката за спроведување на Сашо Мијалков од КПД Струга на повторено судење за случајот ,
стои во соопштението од Управата за извршување санкции.Титаник2` ве информираме дека Управата за извршување на санкции ќе ги преземе сите активности кои се во нејзина надлежност и ќе направи вонреден надзор во установата за утврдување на фактичката состојба.Ќе се утврдува одговорност и ќе бидат санкционирани сите кои направиле пропусти, намерни или ненамерни. За извршениот вонреден надзор, јавноста ќе биде дополнително информирана“,
Денешното одлагање на рочиштето ја зголеми можноста од застарување на делото во однос на Мијалков, кој во овој предмет е обвинет за кривичното дело примање награда за против законито влијание. Според пишувањето на дел од медиумите, кривичното дело за кое се товари Мијалков застарува за околу четири месеци, период во кој се многу мали шансите да се стигне до правосилна пресуда.
Инаку, „Титаник 2“ се однесува на договарање за гласање во ДИК во врска со приговор на ВМРО-ДПМНЕ за локалните избори 2013 година.
Покрај Мијалков и Мендух Тачи, во случајот се обвинети и поранешните членови на ДИК, Бедредин Ибраими, Анета Стефановска, Влатко Сајковски и Сашо Срцев.
Инаку, Кривичниот суд во Скопје втор пат води постапка за овој предмет откако во првиот случај првостепената пресуда беше укината од Апелацискиот суд и предметот беше вратен на повторно одлучување.
Со првостепената пресуда која Кривичниот суд ја донесен на 8 март 2019 година Мијалков доби 3 години затвор, а на 3 години и 2 месеци беше осуден Мендух Тачи.
Најголема затворска казна доби поранешниот член на ДИК, предлог на ДПА, Бедредин Ибраими – 4 години и 6 месеци, додека членовите на ова тело од редовите на ВМРО-ДПМНЕ, Анета Стефановска, Влатко Сајковски и Сашо Срцев добија по три години затвор.
Но, кон крајот на истата година, скопска Апелација соопшти дека се уважени жалбите на обвинетите и дека ја укинува пресудата поради суштествени повреди на постапката и предметот го враќа на повторно судење.
Последната одлука на скопска Апелација со која ја укина првостепената пресуда за случајот „Таргет-Тврдина“, со која ексдиректорот на УБК беше осуден на 12 години затворска казна во врска со аферата за масовното прислушување, ја сензибилизираше јавноста околу разврските на случаите кои произлегоа од истрагите на поранешното Специјално јавно обвинителство.