ВМРО-ДПМНЕ не треба да предложи свој кандидат за потпретседател на Собранието, порача поранешниот пратеник од ВМРО-ДПМНЕ, Илија Димовски.
„Доколку сме сериозна партија, која има намера да опстои на своите принципиелни критики, ВМРО-ДПМНЕ во знак на прифаќање на критиката од јавноста за непотребно големиот број потпретседатели, сама треба да се откаже од тоа место кое и следува“
напиша Димовски на Фејсбук.
Димовски додаде дека ВМРО-ДПМНЕ треба да ги повика сите партии кои, „си направиле пазар за овие функции да го сторат истото“.
ВМРО-ДПМНЕ вчера побара да се тргне од дневен ред предлог-одлуката за одредување на бројот на потпретседатели критикувајќи дека пет потпретседатели се непотребен трошок на државата и служат само за да се задоволат коалициските страсти.
Лидерот на СДСМ, пак, Зоран Заев, критиките на опозицијата ги нарече обид за собирање политички поени на нечесен начин.