Во услови кога деновите ми се важни, и треба да бидам негативен за да си ја работам работата, немам намера да си го загрозувам моето и здравјето на другите, вели вицепремиерот Димитров
Вицепремиерот задолжен за европски прашања, Никола Димитров, вели дека денеска не се појавил на собраниската комисија за надворешни работи, затоа што тој барал средбата да се одржи онлајн поради ситуацијата со ковид-19, но му било одговорено дека таква можност нема.
На денешната седница на Комисијата за надворешни работи, нејзиниот претседател Антонио Милошоски имаше закажано единствена точка на дневен ред за „Утврдување национален став во врска со позициите на официјална Софија по однос на македонските ЕУ-интеграции, засновани на објаснувачкиот меморандум усвоен од Бугарија“.
Димитров вели дека прво многу доцна му било најавено за седницата, но и покрај тоа од неговиот кабинет стапиле во контакт и побарале дебатата да се одржува во некаков онлајн-формат.
„Ни одговорија дека немаат таква можност по Деловникот. Им укажавме дека може да биде и неформална седница или конференција. Па разбравме дека наводно немале технички можности, а за таква работа замислете треба компјутер. Во услови кога деновите ми се важни, и треба да бидам негативен за да си ја работам работата, немам намера да си го загрозувам моето и здравјето на другите. Толку околу ‘шокираноста’ што не сум се појавил“,
напиша Димитров на Фејсбук.
Милошоски од ВМРО-ДПМНЕ информираше дека до почетокот на седницата не добил известување за спреченост од членовите на Комисијата од владејачкото мнозинство и нивните коалициски партнери. На седницата, посочи тој, биле поканети и министерот за надворешни работи, Бујар Османи и вицепремиерот, Никола Димитров.
„Сметам дека ваквото саботирање и избегнување на присуство на седницата на Комисијата само покажува дека тие не се заинтересирани да има заеднички национален став по однос на македонските интереси во спорот, кој е наметнат од страна на соседна Бугарија, преку објаснувачкиот меморандум“,
изјави Милошоски.