Градоначалникот на Куманово кој на овие избори ќе оди како независен кандидат вели дека исклучувањето не е во согласност со партискиот статут и е дело на поединци во раководството
Шверцерска, полноќна одлука на поединци на раководството на мое СДСМ. Вака, градоначалникот на Куманово, Максим Димитриевски ја нарече одлуката за негово исклучување од партијата која го кандидираше за оваа функција пред четири години, а следеше откако Димитривски одлучи на овие локални избори да оди како независен кандидат и да не ја чека партиската одлука.
„Длабоко сум разочаран и искрено жалам за таквата, би рекол шверцерска, полноќна одлука на поединци на раководството на мое СДСМ. Дури ни таквата одлука не е легитимна, затоа што не е во согласност со статутот на СДСМ. Одлуката за исклучување се носи на седница на Извршниот одбор, па потоа на седница на Централниот одбор на партијата. Моите информации велат дека таква седница не се одржала. Формално-правно јас сè уште сум член на СДСМ. Небулозата дека сам себе сум се исклучил не би ја коментирал. Но како и да е, тоа кажува за демократскиот капацитет во партијата и го потврдува мојот став искажан неодамна, дека СДСМ е узурпирана од неколкумина кои со своите интриги и манипулации предизвикуваат огромна разочараност и штета кај членството, симпатизерите и поддржувачите, и сакаат Куманово да го претворат во свој пашалак. Кумановци тоа нема да го дозволат“,
вели Димитриевски во писмената изјава до медиумите.
Генералниот секретар на партијата Љупчо Николовски, вчера, промовирајќи го новиот кандидат за Куманово, рече дека Димитриевски сам се исклучил од партијата. Тој нагласи дека СДСМ има само еден кандидат во Куманово, алудирајќи на забелешките во јавноста дека во најголемата општина во државата СДСМ ќе се натпреварува против СДСМ на овие избори.
Од СДСМ нема засега официјален одговор од кој партиски форум потекнала иницијативата за исклучување на Димитриевски, односно дали тоа се случило на седница на Извршниот одбор пред два дена. Сепак, високи партиски извори за 360 степени потврдуваат дека исклучувањето е завршена работа и таа ќе биде потврдена на првата наредна седница на Централниот одбор.
Откако Димитриевски на 27 август објави дека веќе го собрал потребниот број граѓански потписи за независната кандидатура, од СДСМ оценија дека „тој што им врти грб на граѓаните, на поддржувачите на демократската и прогресивната опција, на членството и базата на СДСМ, не може да биде најдобра опција за кумановци“.
На ова Димитриевски одговори:
„Нема да дозволам и да бидам составен дел на одредени политички интриги на поединци во склоп на мојот политички субјект коишто извршуваат одговорни и политички функции. Затоа, ја послушав иницијативата на граѓаните и денеска се одлучив на ваков потег. Се заблагодарувам на сите кумановчани коишто денеска дадоа масовна поддршка на една ваква иницијатива, бидејќи, сепак, тие заслужуваат почит и признание“, додаде Димитриевски
додаде Димитриевски.