Од кабинетот на Пендаровски велат за „360 степени“ дека за измените гласале пратениците од сите парламентарни групи и дека тие произлегуваат од препораките на ОБСЕ и ОДИХР
Откако Пендаровски го потпиша указот за Изборниот законик, со што го отвори патот за стапување на измените во сила, ДИК денеска усвои измени во роковникот за локалните избори на 17 октомври, кои беа распишани на 6 август, така што процесот е во полн ек
Претседателот Стево Пендаровски го потпиша Указот за прогласување на Изборниот законик, кој вчера експресно го усвои парламентот.
Од кабинетот на Пендаровски велат за „360 степени“ дека за измените гласале пратениците од сите парламентарни групи и дека тие произлегуваат од препораките на ОБСЕ и ОДИХР. Затоа Пендаровски го потпишал указот, иако во една пригода, кога се спореше околу подигањето на прагот за собирање потписи за независни кандидати, најави можно вето.
Првичните предлог измени, кои предвидуваа праг од два проценти за обезбедување независни кандидатури за градоначалници и за советници, не се дел од измените што вчера ги донесе Собранието.
Откако Пендаровски го потпиша указот за Изборниот законик, со што го отвори патот за стапување на измените во сила, ДИК денеска усвои измени во роковникот за локалните избори на 17 октомври, кои беа распишани на 6 август, така што процесот е во полн ек.
Измените на Изборниот законик овозможуваат да гласаат лица на кои им истекол рокот на важност на личните карти, а кој истекол од денот на распишување на изборите до денот на нивно одржување, што значи од 6 август до 30 октомври.
Членот на ДИК, Борис Кондарко, информира дека се предвидува и рок за пријавување на лицата што се позитивни на коронавирусот или се во самоизолација за гласање во домашни услови. Овие лица ќе гласаат еден ден пред одржувањето на првиот круг, односно 16 октомври и 30 октомври доколку има втор круг.
Кондарко кажа дека се воведува и обврска за која е пропишан рок најдоцна до 25 септември до 24 часот, сите службени органи и институции кои располагаат со возила да ги достават податоците до Државната комисија за спречување на корупцијата (ДКСК) со цел увид во нивното користење за време на избори и спречување евентуални злоупотреби.
„За сите радиодифузери, печатени медиуми и портали, кои се регистрирани за платено политичко рекламирање во ДИК, остануваат нивните регистрации, а за оние што го пропуштиле рокот се определува нов рок за регистрација. Тој рок ќе почне на 17 септември и ќе трае до 19 септември, заклучно со недела до 24 часот“,
соопшти Кондарко.