Во изјава за „360 степени“, првиот парламентарец посочува на Уставот, според кој избори распишува претседателот на Собранието. И додека Деркоски чека ново решение од Џафери, од СДСМ неофицијално велат дека каква било негова одлука сега би била неуставна
Додека претседателот на ДИК Оливер Деркоски го чека првиот парламентарец да потпише ново решение за изборите, со нов изборен датум Џафери ги чека партиите да постигнат консезус за изборниот термин, по што, како што вели, ќе ја исполни својата законска обрска.
Во куса изјава за „360 степени“, Џафери посочува дека тој ги распишал изборите на 12 април, врз основа на консензусот што го постигнале партиите за избори на тој датум и за распуштање на Собранието на 16 февруари.
„Се знае според Уставот кој распишува избори. Јас како претседател на парламентот ги распишав изборите на 12 април, кога ме информираа дека има консензус. Нека постигнат консензус и ќе ја исполнам својата уставна обврска“,
ни изјави Џафери.
Од раководството на СДСМ, пак, неофициајлно велат дека „секое решение на Џафери е сега неуставно“, алудирајќи веројатно на тоа дека претседателот на парламентот тврдеше дека Собранието, по распуштањето, нема мандат да се состане повторно, ниту за да прогласи вонредна состојба, ниту за да ги потврди одлуките на претседателот Стево Пендаровски. Од СДСМ сметаат дека нема потреба од ново решение за избори, со оглед на тоа што владината уредба е донесена врз основа на решението за избори на 12 април и со неа се утврдени 22 дена за заокружување на изборниот процес по завршување на вонредната состојба.
Претседателот на ВМРО-ДПМНЕ Христијан Мицкоски денеска предложи изборите да се одржат во средината на јули, најавувајќи можен бојкот на избори на 5 или на 8 јули. Зоран Заев, пак, му одговори со фејсбук-статус кој упатува на тоа дека СДСМ е подготвен да оди на избори на 5 јуни, за што веќе почнаа да течат роковите согласно со владината Уредба за изборниот процес.
Сепак, спроведувањето на изборите не може да почне затоа што претседателот на ДИК Оливер Деркоски одбива да свика седница, иако, согласно со роковите во Уредбата за изборите, денеска требаше да биде донесен ревидиран роковник за преостанатие изборни дејствија, за утре да може да почне кампањата.
Недостапна е и потпретседателката на ДИК од редовите на ДУИ, која би можела да свика седница во отсуство на претседателот. Вицепремиерот Бујар Османи од ДУИ, пак, излезе денеска со избалансиран став, посочи дека се неопходни брзи избори, ама дека евентуалниот бојкот би моќел да предизвика политичка и институционална криза.
Откако не одговараше на телефонските повици ниту од колегите од ДИК, Деркоски подоцна се огласи со став дека нема причина за закажување на седница затоа што според него, за да продолжи целиот изборен процес треба прво претседателот на Собранието да донесе решение со нов датум за избори.
Деркоски изјавил за МИА дека ниту кажал дека денеска ќе свика седница, ниту, пак, планира да го направи тоа додека не добие решение од претседателот на Собранието.
Од денеска сме во редовна состојба во државата и важи Изборниот законик, а не некои уредби што ги донесе Владата за време на вонредната состојба. Четворицата членови на ДИК од СДСМ и Беса ми пуштија пред два часа барање за свикување на седница. Согласно деловникот имаат право да побараат, меѓутоа во барањето се повикуваат на уредбите, а според мене и според многумина во државата и експертска и друга јавност и Уставниот суд уредбите важат само додека трае вонредната состојба. Немам рок за одговор, но ќе им одговорам дали ќе закажам или не седница. Им оставам сами да одлучат како ќе постапуваат, а јас нема да учествувам во незаконити дејствија“, вели Деркоски за МИА.