Безрезервната поддршка од Италија за нас претставува недвосмислена потврда на нашите напори да ја оствариме стратегиската цел да бидеме дел од европското семејство на народи, вели Џафери
Претседателот на собранието Талат Џафери денеска на тет-а-тет средба со италијанскиот претседател Серџо Матарела истакна дека безрезервната поддршка на традиционално партнерските држави, меѓу кои е и Италија, за нас претставува недвосмислена потврда на сите наши напори да ја оствариме стратегиската цел и желба на нашите граѓани – да бидеме дел од европското семејство на народи.
„На средбата претседателот Џафери искажа задоволство што во пресрет на годината кога Северна Македонија и Италија одбележуваат 30 години од воспоставувањето на дипломатските односи, возвратните посети на највисоко ниво се интензивираат. Тој го запозна претседателот Матарела со тековните процеси во Собранието, работата на Пратеничката група за соработка на Собранието и Италијанскиот парламент, како и со политичката состојба во државата. Претседателот Џафери се осврна и на нашата дијаспора во Италија која брои над 100 000 жители и се заблагодари за односот којшто Италија го има во однос на нашите граѓани“,
соопштија од Кабинетот на Џафери.
На средбата на Џафери со италијанскиот претседател, кој е во официјална посета на земјава, соговорниците се осврнаа и на актуелната геополитичка и безбедносна состојба во Европа.
„Со фокус на руската агресија врз Украина и придонесот којшто двете држави, како сојузници во НАТО го имаат за враќање и одржување на европскиот и светскиот мир се разменија мислења за предизвиците со коишто ќе се соочи Европа во сферите на енергетиката и безбедноста на храната“,
се наведува во соопштението.
Во рамки на официјалната посета, претседателот на Италија, Серџо Матарела, се обрати и пред пратениците во Собранието на Република Северна Македонија.