Покрај Џафери, денеска во судот дојдоа и четворица пратеници на ВМРО-ДПМНЕ од минатиот состав: Владимир Ѓорчев, Антонијо Милошоски, Дафина Стојаноска и Лилјана Затуроска. Но, за нивното сведочење немаше време
Околу половина час траеше сведочењето на претседателот на Собранието Талат Џафери во судскиот процес за организацијата на настаните во законодавниот дом од 27 април 2017. Со своето обезбедување, Џафери попладнево се појави во Основниот кривичен суд во Скопје по барање на неговиот претходник Трајко Вељаноски, кој е обвинет како еден од организаторите на „крвавиот четврток“.
Адвокатот на Вељаноски, Еленко Миланов, го прашуваше Џафери околу собранискиот Деловник, сакајќи да докаже дека неговиот клиент не направил ништо спротивно на него. Џафери на прашањата одговараше кратко, се повикуваше на Деловникот.
На тезата што ја застапува одбраната дека имало барање конститутивната седница да продолжи наредниот ден, на 28 април, тој одговори дека немал такво сознание бидејќи во тој период не одел редовно во Собрание, зашто имал смртен случај во семејство.
Одбраната имаше и прашања во насока да го оспори тврдењето дека Вељаноски можел да спречи тензија и да му го исклучи микрофонот на говорникот во одреден момент, како во случајот со тогашниот пратеник Зеќирија Ибраими, кој ја пееше албанската химна, а Крсто Мукоски македонската.
Џафери објасни дека во тој момент на местото каде што седи претседателот на Собранието немало такво копче и оти таква техничка можност е создадена потоа, по негово лично барање. Но, имало можност само, како што нагласи, претседавачот да побара од режијата да го исклучат микрофонот.
И од обвинителката Вилма Русковска и од адвокатот Еленко Миланов, тој доби прашања дали може претседавач на Собранието да ја прекине дискусијата по одредена точка и да премине на друга.
„Имаше барање да се прекине со дискусијата и да се премине на наредна точка. Тоа не се стави на гласање“,
рече Џафери одговарајќи ѝ на Русковска.
Потоа, на прашањето на адвокатот дали може да се случи такво нешто согласно Деловникот и дали некогаш во пракса се случило, Џафери посочи дека немало таков случај, но рече дека не е негова надлежност и не може правно да го толкува Деловникот дали можел Вељаноски да ја прекине дискусијата и да премине на следната точка.
Од неговото сведочење, одбраната на Вељаноски рече дека е задоволна.
„Само го потврдивме деловничкото работење и постапување на господинот Трајко Вељаноски, како и начинот на кој продолжил да постапува и господинот Талат Џафери, а и начинот како што постапувале сите претходни претседатели на Собранието согласно Деловникот“,
изјави адвокатот Миланов пред медиумите.
Покрај Џафери, денеска во судот дојдоа и четворица пратеници на ВМРО-ДПМНЕ од минатиот состав: Владимир Ѓорчев, Антонијо Милошоски, Дафина Стојаноска и Лилјана Затуроска. Но, за нивното сведочење, немаше време бидејќи Миле Јанакиески, кој исто така е меѓу обвинетите, мораше да оди на судското рочиште за предметот ТНТ.
Нивните сведочења, како и на уште неколку други пратеници од минатиот собраниски состав треба да се слушнат на следното рочиште за случајот „27 април“ закажано на 16 октомври.
Со Вељаноски и Јанакиески на обвинителна клупа за организацијата на настаните во Собранието седат и ексминистерот Спиро Ристовски и бившиот директор на УБК, Владимир Атанасовски.
Сите се товарат за терористичко загрозување на уставниот поредок и безбедноста. Според обвинението, по неуспешните преговори за формирање влада од страна на ВМРО-ДПМНЕ, по изборите во декември 2016, тие изготвиле план со намера да ги загрозат уставниот поредок и безбедноста на земјата и да спречат примопредавање на власта.
Во истрагата на Обвинителството за гонење организиран криминал и корупција осомничени беа експремиерот Никола Груевски и ексразузнавачот Никола Бошкоски, но постапката за нив е запрена додека не станат достапни за македонските органи, со оглед на тоа што едниот е избега во Унгарија, а другиот во Грција.