Законот беше донесен со 80 гласа, односно на границата на потребното мнозинство, но во повторено гласање. При првичното гласање имаше 74 гласа „за“, по што неколку пратеници реагираа дека нивниот глас не е регистриран
Претседателот на парламентот Талат Џафери денеска во Уставниот суд ќе го брани донесувањето на Законот за Јавно обвинителство, кој, по долги политички преговори, беше изгласан на последниот работен ден на претходниот собраниски состав, на 16 февруари 2020 година.
Во Уставниот суд денеска треба да се одржи подготвителна седница за иницијативите за оценување на уставноста на Законот за ЈО, но и на Указот за неговото прогласување, што го потпиша претседателот Стево Пендаровски.
На седницата во својство на претставник на Собранието ќе учествува спикерот Џафери.
Законот за јавно обвинителство беше донесен со 80 гласа, односно на границата на потребното мнозинство, но во повторено гласање. При првичното гласање, кое Џафери го поништи поради тоа што некои пратеници реагирале дека нивниот глас не е регистриран, на екранот се појавија 74 гласа „за“
Претседателот Пендаровски веднаш го потпиша Указот за прогласување на Законот, на што реагираа од опозициската ВМРО-ДПМНЕ .
За ВМРО-ДПМНЕ е спорно што законот е донесен со повторено гласање, а спорен е и членот 110, кој предвидува прислушувани разговори да не можат да бидат основа за подигнување обвиненија, туку тие само да служат како индиции. Исклучок од ова веќе законско правило ќе бидат предметите на СЈО покренати до 30 јуни 2017 година. Сите прислушувани разговори што не се предадени во Судот како докази или индиции во истраги, Законот предвидува да се уништат.
Пендаровски, по потпишувањето на Указот им порача сите што имаат забелешки за начинот на гласањето да ги достават до Уставниот суд. Според Уставот, шефот на државата е должен да потпише указ на закон што е донесен со двотретинско мнозинство.
Лани, на 16 февруари, Собранието донесе и измени на Законот за Советот на јавни обвинители, за што опозицијата, исто така, имаше забелешки за гласањето.